Hveravallabjörninn var hross

Sporin sem pólskir ferðamenn rákust á nærri Hveravöllum í gær og talin voru eftir bjarndýr reyndust vera eftir hross. Þetta kemur fram í tilkynningu frá lögreglunni á Blönduósi.

Á þriðja tug björgunarsveitarmanna og lögreglumanna hóf í morgun leit að sporunum á leiðinni frá Hveradölum til Þjófadala, eða á þeirri leið sem ferðamennirnir gengu áður en þeir rákustu á sporin.

Nú í eftirmiðdaginn fannst á afmörkuðu leitarsvæði slóð sem við nánari skoðun reyndist vera eftir hross. „Þar sem þessi spor voru í blautu moldarflagi voru þau mjög stór og komu vel heim og saman við lýsingu ferðamannanna. Niðurstaðan er því sú að þessi spor sem ferðamennirnir sáu eru talin vera eftir hross og er því málinu lokið," segir lögreglan á Blönduósi.