Morðingjarnir vilja fá borgað í dilkum

Íslenskir tónlistarmenn forðast nú krónuna í hrönnum í kjölfar þess að Bubbi Morthens hefur gefið það út að hann vilji fá borgað í evrum. Líkt og Bubbi treysta Morðingjarnir ekki lengur á krónuna. Ástandið er orðið það slæmt að þeir vilja ekki einu sinni fá greitt í gjaldmiðlum heldur bara alvöru fé.

"Við treystum þessum peningakörlum ekki lengur, viljum bara fá borgað í einhverju sem gagnast okkur" sagði Haukur Alfreðsson söngvari Morðingjanna. „Ef allt fer til andskotans eins og allir eru að tala um, stöndum við með pálmann í höndunum ef við reiðum okkur á fé út árið. Þá munum við alla vega hafa úr nógu að bíta og brenna."

Baldvin Esra, framkvæmdastjóri Kimi records (útgefandi

Morðingjanna) telur óskir Morðingjanna vera frekar óvenjulegar en ekki óeðlilegar, "ég er bara á leið inn fjörð að skoða fé, ætla að draga einn dilk með mér suður á föstudag í hádegisfluginu."

Uppgjör fyrstu greiðslu með þessum óvenjulega greiðsluhætti fer einmitt fram á útgáfutónleikum Morðingjanna föstudagskvöldið 25. apríl í Iðnó.

"Ég vona bara að www.midi.is borgi mér í einhverju sem er ekki háð duttlungum spákaupmanna og misviturra stjórnmálamanna", segir Baldvin en miði.is sér um miðasöluna fyrir tónleika Morðingjanna.