Fréttablaðið dreifir blaðberum sem safna blöðum

Blaðberar standa ekki einungis í því að dreifa blöðum því nú er þeim ætlað að safna þeim saman líka. Fréttablaðið hóf í dag að afhenda fyrstu eintökin af endurvinnslutösku sem kallast Blaðberinn. Töskunni er ætlað að safna gömlum dagblöðum og auðvelda þannig fólki að fara með þau í endurvinnslu. 30.000 töskum verður dreift um helgina.

Blaðberinn er taska sem hönnuð er af Tinnu Gunnarsdóttur iðnhönnuði og er fyrsta skrefið í að hvetja fólk til þess að koma dagblöðum í endurvinnslu. Jón Kaldal ristjórsti Fréttablaðsins segir töskunni ætlað að þjóna hvaða dagblöðum sem er sem og ýmsum auglýsingapósti.

„Þessi taska er hugsuð sem blaðakarfa og var mikið lagt í hönnunina á henni. Hún fer ágætlega á heimilum og er ekki ætlað að týnast í geymslum eða þvottahúsum fólks. Það er einnig auðvelt að fletta upp í töskunni ef fólki vantar t.d blað síðan í síðustu viku," segir Jón Kaldal en stefnan er að koma um 30.000 töskum út nú um helgina.

Verður þeim dreift í Kringlunni, Smáralind, Eiðistorgi og fleiri stöðum. Einnig er hægt að nálgast Blaðberann í höfuðstöðvar 365 í Skaftahlíð 24.

Jón segir töluverð verðmæti felast í dagblaðapappír sem er aðallega sendur héðan til Svíþjóðar þar sem hann er notaður í klósett- og eldhúsrúllur.

„Við hugsum þetta svolítið einsog með fiskvinnsluna í gamla daga þegar litið var á allskyns slóg sem verðlaust en síðar kom í ljós að í því felast töluverð verðmæti," segir Jón.

Hann nefnir einnig að nánast öll íslensk dagblöð séu prentuð á pappír úr sjálfbærum skógum.

„Íslensk dagblöð standa því ekki í skógareyðingu því þetta er allt úr svokölluðum nytjaskógum. Fyrir hvert tré sem er fellt fyrir íslenskan dagblaðapappír er plantað nokkrum öðrum trjám."