Losun gróðurhúsalofttegunda frá samgöngum eykst mikið

Losun koltvíoxíðs frá vegasamgöngum hefur aukist um 60 prósent á milli áranna 1990 og 2006. Þetta kemur fram í vefriti fjármálaráðuneytisins og vísað er til mats Vegagerðarinnar.

Á þessum tíma hefur bílafloti landsmanna rúmlega tvöfaldast, úr 134 þúsund bifreiðum í 292 þúsund.

Samkvæmt Kyoto-bókuninni má Ísland auka almenna losun gróðurhúsalofttegunda í heild um 10 prósent frá 1990 til meðaltals áranna 2008-2012. Segir fjármálaráðuneytið ljóst að aukin losun frá samgöngum hér á landi hafi verið mun meiri en önnur aukning og því mikilvægt að draga úr henni til að markmið um heildarlosun náist.

Ráðuneytið vinnur nú að heildarstefnumótun um skattlagningu ökutækja og eldsneytis með það að markmiði að hvetja til notkunar vistvænna ökutækja, orkusparnaðar og minni losunar gróðurhúsalofttegunda frá samgöngum.