Alexander fékk typpi eftir mikla handavinnu

 
Innlent
16:15 16. MARS 2017
Alexander Björn Gunnarsson.
Alexander Björn Gunnarsson. VÍSIR

Ástæða er til að vara lesendur við því að myndirnar, sem sjá má neðst í fréttinni, eru nokkuð sláandi.

Fyrir sex vikum fór Alexander Björn Gunnarsson í átta klukkutíma langa kynleiðréttingaraðgerð þar sem ný aðferð var notuð til að búa til typpi.

Aðgerðin er flókin en skorin var burt húð og fita af handlegg Alexanders ásamt æðum og taugum og því rúllað upp eins og typpi. Síðan var tekið þunnt lag af húð af læri hans og grætt í staðinn á hendina.

„Það eru 6 og hálf vika síðan núna og ég er nokkurn veginn orðinn venjulegur. Ég þarf ennþá að passa mig aðeins en ég er farinn að geta gert alla venjulega hluti, get farið í skólann og svona,“ segir Alexander í samtali við Vísi, aðspurður um hvernig bataferlið gangi.

Rætt var við Alexander Björn í kvöldfréttum Stöðvar 2 þann 13. febrúar síðastliðinn þegar tvær vikur voru liðnar frá aðgerðinni. Þá sagði hann að hann hafi fyrst og fremst farið í aðgerðina fyrir sjálfan sig.

„Þetta er mest fyrir mig. Ég vil geta horft í spegil og verið ánægður með það sem ég sé. Ekki endilega til að pissa í pissuskálar eða stunda kynlíf eða eitthvað svoleiðis. Það er mikilvægt fyrir mig að vera ánægður með það sem ég sé þegar ég horfi á sjálfan mig.“

Fyrir tveimur árum byrjaði Alexander í ráðgjöf og hormónameðferð. Fyrir ári síðan fór hann í brjóstnám og um svipað leyti kynntist hann kærustunni sinni. Þau eiga von á barni saman í sumar og eru bæði virk í Samtökunum78. Hann segist vilja tala opinskátt um aðgerðina.

„Þetta er kannski óeðlileg leið hjá mér en mig langaði, líka af því að ég er með þeim fyrstu á Íslandi til að fara í svona aðgerðir, að vera svolítil fyrirmynd fyrir þá sem eru yngri og getað hjálpað þeim ef þeir þurfa á því að halda.


Alexander Björn bloggar nú um bataferli sitt á síðunni phalloiniceland.tumblr.com.

„Það hjálpaði mér rosalega mikið að lesa svona blogg áður en ég fór í aðgerð hjá erlendum strákum. Þannig að mig langaði bara að hafa kannski einhverja reynslu frá Íslandi fyrir aðra stráka sem gætu verið að pæla í að fara í þetta,“ segir Alexander Björn.

„Ég er búinn að fá mjög góð viðbrögð. Ég er búinn að fara í nokkur viðtöl og svo hafa nokkrir transstrákar haft samband við mig og þakkað mér fyrir þetta.“

Hann birti í gær á bloggsíðu sinni myndir af handleggnum sínum og hvernig hann hefur gróið. Þó að sárið virðist vera nokkuð slæmt segist Alexander ekki finna til.

„Ég finn ekkert til í þessu. Þetta er svolítið stíft bara. Þetta er eins og ör sem á eftir að mýkjast upp og lýsast og svona,“ segir Alexander.


Fjórum dögum eftir ađgerđ
Fjórum dögum eftir ađgerđ MYND/ALEXANDER BJÖRN


Einni viku eftir ađgerđ
Einni viku eftir ađgerđ MYND/ALEXANDER BJÖRN


2 vikum eftir ađgerđina.
2 vikum eftir ađgerđina. MYND/ALEXANDER BJÖRN


3 vikum eftir ađgerđina
3 vikum eftir ađgerđina MYND/ALEXANDER BJÖRN


4 vikum eftir ađgerđ.
4 vikum eftir ađgerđ. MYND/ALEXANDER BJÖRN


Fimm vikum eftir ađgerđ
Fimm vikum eftir ađgerđ MYND/ALEXANDER BJÖRN


Sex vikum eftir ađgerđ
Sex vikum eftir ađgerđ MYND/ALEXANDER BJÖRN


Deila
Athugiđ. Allar athugasemdir eru á ábyrgđ ţeirra er ţćr rita. Vísir hvetur lesendur til ađ halda sig viđ málefnalega umrćđu. Einnig áskilur Vísir sér rétt til ađ fjarlćgja ćrumeiđandi eđa ósćmilegar athugasemdir og ummćli ţeirra sem tjá sig ekki undir eigin nafni.

 

MEST LESIĐ

  • Nýjast á Vísi
  • Mest Lesiđ
  • Fréttir
  • Sport
  • Viđskipti
  • Lífiđ
Forsíđa / Fréttir / Innlent / Alexander fékk typpi eftir mikla handavinnu
Fara efst