5.000 börn gengu gegn einelti í Kópavogi

„Þetta gekk alveg ótrúlega vel. Hátt í 5.000 börn og unglingar, allt frá þriggja ára aldri og upp í 16 ára, gengu saman og báru áletruð hvatningarspjöld, segir Arna Schram, upplýsingafulltrúi Kópavogsbæjar.

Krakkar í Kópavogi gengu saman um bæinn í gær á baráttudegi gegn einelti. Þetta er í þriðja sinn sem 8. nóvember er helgaður baráttunni gegn einelti en í fyrsta sinn tóku leikskólabörn í Kópavogi þátt í átakinu.

Ármann Kr. Ólafsson, bæjarstjóri í Kópavogi, var að vonum glaður með daginn en hugmyndina að deginum fékk hann sjálfur fyrir nokkrum árum. „Ég er eiginlega bara hálf klökkur yfir því að þessa litla hugmynd sem ég fékk hér um árið sé búin að vinda svona upp á sig. Eins finnst mér frábært að sjá að leikskólabörnin taki þátt. Fræðimenn segja nefnilega að ef það á að fyrirbyggja einelti, að þá verði að byrja að vinna með börnum snemma á lífsleiðinni."

Á vef Kópavogsfrétta má sjá myndband af því þegar krakkarnir sameinuðust á Rútstúni fyrir neðan Sundlaug Kópavogs og sungu saman söngva undir stjórn Þórunnar Björnsdóttir, kórstjóra Skólakórs Kársness.