„Ég var nú ekkert sérstaklega drukkin“

Guðfinna Jóhanna Guðmundsdóttir, borgarfulltrúi Framsóknarflokksins,  neitar því að hún hafi verið mjög drukkin sl. föstudagskvöld þegar hún, Vigdís Hauksdóttir og Sveinbjörg B. Sveinbjörnsdóttir kíktu við í partýi hjá hagfræði-og stjórnmálafræðinemum.

Myndband af nokkurs konar uppistandi stjórnmálakvennanna í partýinu hefur farið eins og eldur í sinu um internetið.

„Ég var nú ekkert sérstaklega drukkin. [...] Ætli ég hafi ekki verið búin að drekka tvö hvítvínsglös,“ sagði Guðfinna í samtali við Harmageddon í morgun. Hún segir að Sveinbjörg hafi verið bláedrú og þær hafi bara verið að gera grín að sjálfum sér og umræðunni sem var í vor.

„Ég hef bara svona kaldhæðnislegan og andstyggilegan húmor, því miður,“ sagði Guðfinna jafnframt. Aðspurð sagði hún að framkoma hennar, Sveinbjargar og Vigdísar væri ekki á gráu svæði.

Aftur móti setur hún spurningamerki við það á hvaða stað við séum komin þegar fólk er að taka upp á síma á föstudagskvöldi úti í bæ en segir þó að hún sé ekkert að missa svefn yfir uppákomunni.