„Algjör uppstokkun á samningi lækna“

„Mér líður bara vel. Ég vona að landsmenn séu ánægðir með að verkfalli verði aflýst,“ sagði Sigurveig Pétusdóttir við blaðamenn rétt áður en skrifað var undir samninga lækna í Læknafélagi Íslands við ríkið. Með samningnum er verkfallsaðgerðum lækna, sem staðið hafa síðan 27. október, lokið.

Samningar tókust um klukkan 2:45 í nótt og var fjölmiðlum tilkynnt að skrifað yrði undir samninga um klukkan 3:30. Vísir hafði áður greint frá því að líklegt væri að samningar tækjust um nóttina sem varð raunin. Fjölmiðlamenn héldu því í húsnæði ríkissáttasemjara í Borgartúni þar sem skrifstofustjórinn Elísabet Ólafsdóttir tók á móti fólki.

Var vöffludeigið klárt þegar fjölmiðla bar að garði upp úr klukkan 03. Hafði Elísabet á orði að deiluaðilar vildu undantekningalítið fá sínar vöfflur óháð því á hvaða tíma sólarhringsins væri samið. Fengust þær upplýsingar að verið væri að lesa yfir samninginn. Um klukkan hálf fjögur komu svo deiluaðilar fram og Sigurveig fékk sér fyrstu vöffluna.

„Auðvitað var þrýstingur að ná samningum en við fundum mikinn jákvæðan stuðning frá almenningi. Við erum mjög þakklát fyrir það,“ sagði Sigurveig sem svaraði spurningum fréttamanna sem vissu sem var að ekkert yrði gefið upp um einstök atriði samningsins.

Aðspurð sagðist Sigurveig sátt við samninginn. Annars væri ekki komið að því að skrifa undir. Hún vonar að samningurinn verði til þess að læknar haldist frekar hér á landi.

„Það er ekkert sem tryggir það fullkomlegea en við teljum að þetta sé gott skref í á átt.“

Sjá einnig: Verkfalli lækna aflýst

Sigurveig vildi sem fyrr segir ekki gefa neitt uppi um einstök atriði samningsins sem er 33 blaðsíður. Fyrst yrði hann kynntur félagsmönnum. Sjá mátti á fulltrúum samninganefndar lækna að þeim var létt að samningar höfðu tekist.

Slógu þeir á létta strengi og því næst fóru fulltrúarnir að bera saman bækur sínar varðandi vinnu næsta daga. Sumir voru svo heppnir að eiga vaktafrí í dag og ætluðu að sofa út eftir 14 klukkustunda fundarsetu. Aðrir voru klárir að mæta til vinnu klukkan átta í morgun.

Samningurinn kynntur læknum í næstu viku

„Þetta er náttúrulega algjör uppstokkun á samningnum,“ sagði Sigurveig og benti á að í samningnum fælist meðal annars breytt vinnufyrirkomulag og ýmislegt í þeim dúrnum. Hún sagðist eiga von á því að félagsmenn samþykktu samninginn.

„Annars myndum við ekki skrifa undir.“

Að loknu viðtalinu héldu deiluaðilar á skrifstofu þar sem sest var við borð og samningurinn látinn ganga til undirritunar. Einn aðili úr samninganefnd lækna var farinn til Svíþjóðar og höfðu félagar hans á orði að sá hlyti að vera svekktur að hafa misst af samningsdeginum eftir ellefu vikna verkfallsaðgerðir.

Magnús Pétursson ríkissáttasemjari var í hlutverki fundarstjóra, þakkaði báðum aðilum fyrir viðræðurnar og sagði að samningurinn væri einn af þeim eftirminnilegri sem hann hefði komið að. Að lokinni undirskrift tókust allir í hendur og þökkuðu fyrir sig. Þaðan var haldið í vöfflurnar um klukkan 3:45.

Gunnar Björnsson, formaður samninganefndar ríkisins, sagðist í viðtali við fréttastofu Stöðvar 2 þokkalega sáttur við samninginn.

Þá staðfesti Þorbjörn Jónsson, formaður Læknafélags Íslands, að samningurinn yrði kynntur félagsmönnum í næstu viku.

Fulltrúar Skurðlæknafélags Íslands funda með ríkissáttasemjara klukkan tíu í fyrramálið, miðvikudag. Ríkissáttasemjari staðfesti við blaðamann að hann yrði mættur þangað áður en gengið var frá þeim vöfflum sem afgangs voru. Fjölmiðlamenn og deiluaðilar yfirgáfu húsnæðið um klukkan 4:25.

Post by Vísir.is.