Getur sótt um undanþágu hjá Heimavarnarráðuneytinu

Dagbjört Rós Halldórsdóttir var rekinn frá Bandaríkjunum fyrir tveimur mánuðum, eftir að hún var handtekinn fyrir hraðakstur. Dvalarleyfi hennar var útrunnið en erfiðleikar voru í hjónabandinu og bandarískur eiginmaður hennar hafði þá um tíma komið sér undan því að skrifa upp á umsókn hennar um græna kortið.

Atvinnuleysi á ekki að vera hagstjórnartæki segir ASÍ

Ólafur Darri Andrason hagfræðingur ASÍ segir hugmyndir framkvæmdastjóra Samtaka atvinnulífsins um að opna vinnumarkaðinn enn frekar til að draga úr verðbólgu benda til að hann vilji nota atvinnuleysi sem hagstjórnartæki. Framundan sé atvinnuleysi vegna loka stóriðjuframkvæmda og aflasamdráttar og óvarlegt sé að kynda enn frekar undir það.

Ingibjörg segir Peres vongóðan um frið

Ingibjörg Sólrún Gísladóttir utanríkisráðherra segir að Shimon Peres nýr forseti Ísraels sé bjartsýnn á friðarferlið á svæðinu þrátt fyrir að mörg tækifæri hafi glatast á síðustu misserum. Ingibjörg er fyrst erlendra ráðamanna til að hitta Peres eftir að hann tók við forsetaembætti.

SPRON fyrirhugar breytingar í hlutafélag

Stjórn SPRON samþykkti í dag að undirbúa breytingu sparisjóðsins í hlutafélag og óska eftir skráningu félagsins í Norrænu kauphöllina á Íslandi. Þetta kemur fram í tilkynningu frá SPRON. Breyting sparisjóðsins í hlutafélag verður háð samþykki stofnfjáreigenda og Fjármálaeftirlitsins.

Sviptur leyfi til að ávísa róandi og örvandi lyfjum

Heilbrigðisráðuneytið hefur svipt þekktan geðlækni leyfi til að ávísa róandi og örvandi lyfjum. Leyfissviptingin er að tillögu landlæknis en embættinu hefur borist fjöldi ábendinga um að læknirinn ávísi ekki lyfjum samkvæmt læknisfræðilegum aðferðum.

Reyk lagði frá Járnblendiverksmiðjunni á Grundartanga

Mikinn reyk lagði frá Járnblendiverksmiðjunni á Grundartangi nú síðdegis eftir að viftur sem sjá um að soga reyk frá verksmiðjunni hættu að virka. Aðeins tók nokkrar mínútur að koma viftunum aftur í gang.

Fluttur á slysadeild eftir trampólínslys

Flytja þurfti karlmann á þrítugsaldri á slysadeild um síðustu helgi eftir óhapp á trampólíni. Maðurinn fékk slæma byltu og féll í yfirlið skamma stund. Þá fékk hann einnig skurð á andlitið.

Mömmu var ekki skemmt

Spænskur faðir hefur verið sviptur umgengnisrétti við tíu ára gamlan son sinn, eftir að móðirin sá myndir af þeim í nautahlaupinu í Pamplona. Hjónin eru skilin en sonurinn var í sumarfríi með föður sinum. Á myndunum sem móðirin sá voru feðgarnir á harðahlaupum nokkrum metrum á undan 600 kílóa tarfi. Hún hringdi þegar í lögregluna.

Bára Friðriksdóttir valin í Tjarnaprestakalli

Valnefnd í Tjarnaprestakalli, Kjalarnesprófastsdæmi, ákvað á fundi sínum þann 6. júlí síðastliðinn að leggja til að sr. Bára Friðriksdóttir verði ráðin sóknarprestur í Tjarnaprestakalli. Níu umsækjendur voru um embættið. Embættið veitist frá 1. september 2007.

Tilkynning frá vegagerðinni

Vegna mikilla blæðinga í malbiki á Kræklingahlíð norðan Akureyrar eru vegfarendur beðnir að sýna sérstaka aðgát meðan þetta ástand varir og fylgja fyrirmælum um lækkun á umferðarhraða. Búið er að gera við skemmdir á klæðningu á Þingvallavegi við Grafningsvegamót. Vegfarendur eru þó enn beðnir að sýna aðgát vegna steinkasts.

Madeleine Potter

J.K. Rowling, höfundur bókanna um Harry Potter hefur farið framá að mynd af Madeleine McCann verði hengd upp í öllum bókabúðum þar sem nýjasta bókin um galdrastrákinn verður seld. Madeleine, sem er fjögurra ára gömul var rænt af hóteli í Portúgal fyrir tveimur og hálfum mánuði.

Undirbúningur hafinn fyrir geimskot Endeavour

Sjö manna áhöfn Endeavour geimskutlunnar frá Nasa er komin til Flórída þar sem undirbúningur fyrir flugtak skutlunnar hefst. Flugtakið er sett þann 7da ágúst. Áfangastaðurinn er Alþjóðageimstöðin þar sem byggingu stöðvarinnar verður haldið áfram.

Þrettán stútar teknir um helgina

Þrettán ökumenn voru teknir fyrir ölvunarakstur í umdæmi lögreglunnar á höfuðborgarsvæðinu um helgina. Þetta voru tólf karlar og ein kona á fimmtugsaldri. Lögreglan stöðvaði sömuleiðis för sex annarra ökumanna í Reykjavík um helgina. Fimm þeirra höfðu þegar verið sviptir ökuleyfi og einn hafði aldrei öðlast ökuréttindi. Þetta voru allt karlmenn.

Nafn mannsins sem lést á Akrafjallsvegi

Maðurinn sem lést í umferðarslysi á Akrafjallsvegi í gær hét Aðalsteinn Davíð Jóhannsson. Hann var 35 ára gamall og bjó á Akranesi. Hann lætur eftir sig eiginkonu og tvö ung börn.

Líbanski herinn sækir lengra inn í flóttamannabúðir

Líbanskar hersveitir sóttu í dag lengra inn í flóttamannabúðir þar sem þær hafa barist við liðsmenn Fatah al-Islam síðan 20. maí síðastliðinn. Samtökin eru sögð tengjast Al Kæda. Líbanski herinn hefur nú hrakið liðsmenn þeirra inn í lítið horn flóttamannabúðanna. Að minnsta kosti 227 hafa fallið í þessum átökum.

Faðir stúlkunnar vill hjálp barnaverndaryfirvalda

Stúlkunni sem réðst á jafnöldru sína í tívolíinu við Smáralind síðustu viku var vísað úr skóla síðastliðið haust. Hún er á skólaskyldualdri en fékk ekki skólavist síðastliðinn vetur. Faðirinn segist hafa átt viðtöl við barnaverndaryfirvöld í dag og leiti eftir úrræðum á þeirra vegum.

Rússar hóta að reka 80 breska diplomata úr landi

Rússar hafa hótað að reka 80 breska diplomata úr landi í hefndarskyni fyrir brottrekstur fjögurra rússneskra diplomata frá Bretlandi. Rússarnir voru reknir vegna tregðu stjórnvalda til þess að framselja meintan morðingja rússneska njósnarans Alexanders Litvinenkos.

Auðveldara á tveimur jafnfljótum

Mannskepnan stóð upp á afturlappirnar og hóf að ganga upprétt vegna orkusparnaðar sem felst í því. Þetta er niðurstaða bandarískra vísindamanna. Báru þeir saman göngulag nútímamanna og simpansa, sem beita að jafnaði fjórum útlimum við ferðalög sín.

Mikið um innbrot í bíla

Lögreglan á höfuðborgarsvæðinu ítrekar á vefsíðu sinni við vegfarendur að skilja ekki verðmæti eftir í bílum sínum. Sé það óumflýjanlegt er mikilvægt að verðmæti séu ekki í augsýn. Talsvert hefur verið um innbrot í bíla upp á síðkastið. Þjófar virðast meðal annars sækjast eftir geislaspilurum, myndavélum og GPS-tækjum.

Sjúkraflutningamenn vilja ekki Benz

Sjúkraflutningamenn óttast öryggi sitt og farþega í nýjum sjúkrabílum sem keyptir hafa verið til landsins. Í mörg ár hefur Slökkvilið höfuðborgarsvæðisins notað bíla af Econline gerð. Nú hafa hins vegar verið keyptir bílar af gerðinni Benz-Sprinter.

Vill líta á alla landsmenn sem líffæragjafa

Landlæknir Bretlands vill breyta lögum þannig að litið sé á alla þegna landsins sem viljuga líffæragjafa, nema þeir óski sérstaklega eftir því að vera það ekki. Í dag er þessu þveröfugt farið. Sir Liam Donaldson segir að með því megi bjarga hundruðum mannslífa á hverju ári.

Íslendingar nálgast heimsmeistaratitil í skólaskák

Skáksveit Salaskóla er efst í flokki 14 ára og yngri á heimsmeistaramóti í skák sem fram fer í Tékklandi þessa dagana. Íslendingarnir hafa 3,5 vinning í forskot á næstu sveit þegar aðeins tveimur umferðum er ólokið á mótinu.

Bjórsalar herja á ungmenni höfuðborgarinnar

Svokallaðir bjórsalar hafa komið í stað landasala í því að sjá ungmennum höfuðborgarinnar fyrir áfengi. Bjórsalar eru ungt fólk með aldur til að kaupa áfengi í vínbúðum, sem selja bjór til ungmenna með umtalsverðri álagningu. Sem dæmi má nefna að kippa af Viking Lager kostar 2500 krónur hjá bjórsala, en 990 krónur í vínbúð. Þetta er rúmlega 150% hækkun.

Sýrlendingar heimta Golan hæðir

Sýrlendingar segja að þeir muni ekki hefja friðarviðræður við Ísrael nema Ísraelar gefi fyrirfram loforð um að skila öllum Golan hæðunum. Bashar al-Assad, forseti Sýrlands lýsti þessu yfir á sýrlenska þinginu í dag.

Tyrkneskur þingframbjóðandi myrtur

Tyrkneskur frambjóðandi sjálfstæðisflokkssins var skotinn til bana í Istanbul í gærkvöldi. Alþingiskosningar fara fram á sunnudag í landinu. Frambjóðandinn Tuncay Seyranlioglu var í bíl á leið úr sjónvarpsviðtali þegar skotárás var gerð á hraðbraut í borginni. Þrír farþegar í bílnum voru fluttir slasaðir á sjúkrahús.

Fundur Ingibjargar og Peres vakti athygli

Ingibjörg Sólrún Gísladóttir utanríkisráðherra hitti Shimon Peres forseta Ísrael á fundi í Jerúsalem í morgun. Ingibjörg er fyrsti erlendi ráðamaðurinn sem Peres hittir í embætti forseta, en hann tók við því á sunnudag. Fundurinn vakti mikla athygli fjölmiðla í Ísrael og er fjallað sérstaklega um Ísland af því tilefni.

Áhöfn TF-SIF má ekki ræða tildrög slyssins

Áhöfnin á TF SIF má ekki ræða við fjölmiðla þar sem rannsókn stendur yfir á orsökum þess að þyrlan brotlenti í sjónum skammt undan Straumsvík. Björn Bjarnason dómsmálaráðherra ræddi við áhöfnina í gær og sagði hana hafa staðið sig með prýði. Þyrlan var á æfingu með björgunarsveit Hafnarfjarðar þegar þegar hún missti skyndilega afl.

Bíll fór í Kópavogshöfn

Unnið er að því að draga vörubíl sem féll í höfnina í Kópavogi upp aftur. Bíllinn fór í sjóinn þegar vinna stóð yfir við uppfyllingu í höfninni. Bakkinn gaf sig undan þunga bílsins. Einn maður var í bílnum og slapp hann ómeiddur.

Þyrlan líklega ónýt vegna seltu

Þyrla Landhlegisgæslunnar, sem brotlenti í sjónum út af Straumsvík í gærkvöldi, var dregin til lands í nótt og flutt í flugskýli við Reykjavíkurflugvöll til rannsóknar. Vonast er til að upplýsingar úr flugrita hennar varpi ljósi á atburðinn. Talið er að þyrlan, sem þjónað hefur hér við björgunarstörf í rúma tvo áratugi, sé ónýt þar sem selta komst í allan viðkvæman rafbúnað hennar. Að sögn Rannsóknanefndar flugslysa, sem hefur nú umsjón með þyrlunni, eru tildrög atviksins ókunn, en flugriti hennar verður sendur til aflestrar í Bretlandi.

Íranar segja fund með Bandaríkjamönnum líklegan

Utanríkisráðherra Írans sagði í dag að miklar líkur væru á því að Bandaríkin og Íran myndu eiga viðræður í náinni framtíð. Ummæli hans þykja gefa til kynna að fundur verði haldinn á næstunni en utanríkisráðherrar landanna tveggja hittust í Írak í maí síðastliðnum. Talið er að ríkin tvö muni ræða öryggisástandið í Írak og leiðir til þess að bæta úr því.

Fjölskyldur HIV smitaðra barna þiggja bætur

Rúmur helmingur fjölskyldna þeirra 426 barna sem smituðust af HIV veirunni í Líbíu fyrir nokkrum árum hefur þegar fengið bætur sem þeim var lofað. Afgangur þeirra fær væntanlega bæturnar í dag.

Al-Sadr tekur þátt í stjórnmálum á nýjan leik

Stjórnmálaarmur samtaka sjía klerksins Múktada al-Sadr tilkynnti í dag að hann hefði hafið þátttöku í írakska þinginu á ný. Fyrir mánuði síðan dró hann sig úr stjórnarsamstarfi vegna óánægju með viðbrögð stjórnvalda við árás á heilaga mosku sjía múslima.

Síamstvíburar í Kína bíða aðgerðar

síamstvíburar sem fæddust í Kína bíða nú aðskilnaðar. Opinber fréttastofa Kína sendi í gær frá sér myndir af stúlkunum í fyrsta sinn, en sagði ekki til um hvort um stráka eða stúlkur væri að ræða. Tvíburarnir fæddust þann 15. mars síðastliðinn og fara brátt í aðgerð.

Slysum á Miklubraut fjölgaði um 45%

Aftanákeyrslum í Reykjavík fjölgaði um 25% árið 2006. Flest tjón verða á Miklubrautinni og fjöldi slasaðra þar aukist um 45%. Og enn einu sinni eru gatnamót Miklubrautar og Kringlumýrarbrautar þau tjónamestu. Þetta kemur fram í samantekt Sjóvá Forvarnarhússins fyrir árið 2006.

Tré drukkna í Osló

Á meðan úrkoman í Reykjavík hefur aðeins verið sjö millimetrar frá miðjum júní, eru tré að drukkna í Osló vegna mikilla rigninga undanfarnar vikur. Tré eru einnig að falla þar vegna þess að jarðvegurinn er orðinn svo gljúpur að ræturnar hafa litla festu.

Lögreglan rannsakar árásina við tívolíið í Smáralind

Mál stúlkunnar sem réðst á jafnöldru sína við tívolíið í Smáralind á þriðjudag í síðustu viku er í athugun lögreglu. Lögreglumenn sem tóku stúlkuna á vettvangi hafa sent skýrslu til ofbeldisbrotadeildar lögreglunnar á höfuðborgarsvæðinu. Stúlkan sem ráðist var á hefur ekki kært árásina en lögreglan lítur málið alvarlegum augum.

Erdogan hótar að hætta í stjórnmálum

Forsætisráðherra Tyrklands, Tayyip Erdogan, sagði í dag að hann myndi hætta afskiptum af stjórnmálum ef flokkur hans næði ekki að mynda eins flokks stjórn eftir kosningarnar sem verða á sunnudaginn kemur. Skoðanakannanir gefa til kynna að flokkur hans, AK, muni fá nógu mörg atkvæði til þess að ná meirihluta á þingi.

Tæplega 42.000 skátar koma saman á alheimsmóti

Tæplega 42.000 skátar frá 159 þjóðlöndum munu sækja 21. alheimsmót skáta sem haldið verður í Hylands-Park í Englandi dagana 27. júlí til 8. ágúst. Frá Íslandi fara ríflega 440 íslenskir skátar og mun það vera stærsti hópur sem skátar á Íslandi hafa nokkru sinni sent á viðburð erlendis. Rúmlega 320 þessara þátttakenda eru unglingar á aldrinum 14-18 ára.

Heildarafli jókst í júní

Heildarafli íslenskra skipa í nýliðnum júnímánuði var 6,4% meiri en í júní 2006, en það sem af er árinu hefur hann dregist saman um 1,6% miðað við sama tímabil 2006, miðað við fast verðlag. Aflinn nam alls 111.570 tonnum í júní 2007 samanborið við 135.515 tonn í júní 2006.

Erfitt að sannfæra N-Kóreu um að afvopnast

Stjórnarerindrekar Bandaríkjamanna sögðu við upphaf afvopnunarviðræðna í Bejing í gær að erfitt gæti reynst að sannfæra Norður-Kóreumenn um að láta af kjarnorkuvopnaáætlunum sínum. Norður Kórea lokaði kjarnorkuofni í Yongbyon á laugardaginn og var það fyrsta skref í afvopnunarsamningi sem samþykktur var í febrúar.

Þungir dómar í barnaþrælkunarmáli í Kína

Yfirvöld í Kína dæmdu í morgun einn mann til dauða og 28 í lífstíðarfangelsi fyrir aðild sína að umfangsmiklu barnaþrælkunarmáli. Eigendur, verkstjórar og glæpamenn hjá fyrirtækjunum sem komu að málinu voru þeir sem hlutu dóma. Börnin voru látin herða múrsteina í þartilgerðum ofnum. Þau unnu í 14 til 16 tíma, án launa og fengu oft barsmíðar að degi loknum. Vistarverur þeirra voru litlu betri en fangelsisklefar.

Björgunarbátur kallaður út í nótt

Bátsverjar á litlum skemmtibáti óskuðu eftir aðstoð þegar vél bátsins bilaði þegar hann var staddur skammt utan við Hafnarfjarðarhöfn um klukkan hálf tvö í nótt.

Erkibiskup í Zimbabwe kærður fyrir framhjáhald

Einn helsti andstæðingur Roberts Mugabe, forseta Zimbabwe, erkibiskupinn Pius Ncube, hefur verið kærður fyrir framhjáhald. Kærandinn er eiginmaður konu sem vinnur á skrifstofu biskupsins.

Unnið að því að ná flugrita úr TF Sif

Unnið er að því að ná flugrita TF Sif, þyrlu Landhelgisgæslunnar, úr flakinu samkvæmt tilkynningu frá Rannsóknarnefnd flugslysa. Ekkert er hægt að segja ennþá um orsakir slyssins.

Bók um Jón Ásgeir gefin út í Bretlandi

Jóni Ásgeiri Jóhannessyni, starfandi stjórnarformanni Baugs, er lýst sem glaumgosa sem sé að kaupa upp Bretland í nýrri bók sem komin er í forsölu. Bókin er gefin út í óþökk Jóns Ásgeirs og ber heitið Sex, Lies and Supermarkets eða kynlíf, lygar og stórmarkaðir.