„Ég ætla rétt að vona að það sé ekki verið að stríða mér hérna“

Spurningasprettur fór í loftið á Stöð 2 þarsíðustu helgi, nánar tiltekið á laugardagskvöldinu. Um er að ræða skemmtilegan spurningaþátt þar sem keppandi svarar valflokkaspurningum og getur unnið sér inn allt að þrjár milljónir svari hann öllum fimmtán spurningunum. Keppandi fær þrjár líflínur og aðstoð frá stuðningsliðinu.

Kristófer Skúli var brattur þegar hann mætti til Gumma. Hann mætti með fjölskylduna frá Blönduósi sér til stuðnings. Hann hóf keppni á að velja sér flokka og valdi íþróttir, sjónvarpsþætti, mat og drykk, náttúru og sögu.

Hann raðaði svo flokkunum og ákvað að byrja á sögu en sú spurning var erfiðari en hann átti von á. Spurningin var um Þorrann en Kristófer fór að endingu ekki snauður heim líkt og sjá má í þættinum í heild sinni.