Viðskipti erlent

Markaðs­virði Coca Cola hríð­lækkar daginn eftir upp­á­tæki Ron­aldos

Atli Ísleifsson skrifar
Cristiano Ronaldo fjarlægir kókið á fréttamannafundinum í Búdapest. Hann hvatti jafnframt fólk til að drekka vatn.
Cristiano Ronaldo fjarlægir kókið á fréttamannafundinum í Búdapest. Hann hvatti jafnframt fólk til að drekka vatn.

Markaðsvirði Coca Cola lækkaði um fjóra milljarða Bandaríkjadali í gær, daginn eftir að portúgalski knattspyrnumaðurinn Cristiano Ronaldo fjarlægði tvær kókflöskur af borðinu á fréttamannafundi portúgalska landsliðsins í tengslum við EM í fótbolta sem nú stendur yfir.

Guardian segir frá því að hlutabréf hafi lækkað um 1,6 prósent, nær samstundis eftir uppátæki Portúgalans. Það samsvarar því að markaðsvirði hafi lækkað um fjóra milljarða dala, eða um 490 milljaðar íslenskra króna.

Á fréttamannafundinum fjarlægði Ronaldo kókflöskurnar sem hafði verið komið fyrir þar í auglýsingaskyni og hvatti hann á sama tíma fólk til að drekka vatn.

Í yfirlýsingu frá Coca Cola, sem er opinber styrktaraðili Evrópumótsins, til Guardian segir að „allir hafi rétt á að hafa mismunandi smekk og þarfir“.

Talsmaður Evrópumótsins segir sömuleiðis í samtali við breska blaðið að einnig sé boðið upp á vatn og kók án sykurs á fréttamannafundunum sem tengjast mótinu.

Ronaldo er sannkölluð ofurstjarna og er með nærri 300 milljónir fylgjenda á Instagram.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×