Innlent

Ferðamenn hvattir til þess að drekka kranavatn

Sunna Kristín Hilmarsdóttir skrifar
Bareigandinn, danskennarinn og ljósmyndarinn George Leite tekur þátt í herferðinni.
Bareigandinn, danskennarinn og ljósmyndarinn George Leite tekur þátt í herferðinni. íslandsstofa
Ferðamenn sem koma hingað til lands eru hvattir til þess að drekka kranavatn og draga úr plastnotkun í nýrri markaðsherferð Íslandsstofu undir merkjum Inspired by Iceland.

Herferðin er unnin í samstarfi við Umhverfisstofnun og fleiri aðila að því er fram kemur í tilkynningu frá Íslandsstofu en í henni er lögð áhersla á að kynna íslenska vatnið sem lúxusvöru undir heitinu „Kranavatn“ sem finna má ókeypis í næsta krana um land allt.

„Markmiðið er að draga úr óþarfa plastnotkun ferðamanna og vekja um leið athygli á gæðum íslenska vatnsins sem er eitt hreinasta og bragðbesta kranavatn í heimi. Með verkefninu er einnig ætlunin að styðja við umhverfisvernd og aðgerðir til að uppfylla Heimsmarkmið Sameinuðu þjóðanna.

Í könnun sem framkvæmd var meðal 16.000 manns í Norður-Ameríku og Evrópu sögðust 65% aðspurðra nota meira af plastflöskum á ferðalögum heldur en heima hjá sér. Aðspurð um meginástæður þess nefndu 70% órökstuddan ótta við kranavatn og 19% nefndu þægindi. Í Kranavatnsherferðinni er skorað á ferðamenn að breyta þessu mynstri og drekka vatn beint af krana þegar þeir ferðast um Ísland og fylla á endurnýjanleg ílát í stað þess að kaupa vatn á plastflöskum.

Fáar þjóðir hafa jafn gott aðgengi að vatni eins og Íslendingar. Íslenska vatnið er einnig sérstakt að því leyti að 98% af því er ómeðhöndlað grunnvatn og mælingar sýna að óæskileg efni eru langt undir viðmiðunarmörkum samkvæmt upplýsingum frá Umhverfisstofnun. Neysluvatn á Íslandi er alls staðar talið hreint og öruggt til neyslu og erlendir ferðamenn átta sig ekki allir á þeirri staðreynd,“ segir í tilkynningu Íslandsstofu.

Þar er jafnframt haft eftir Þórdísi Kolbrúnu Reykfjörð Gylfadóttur, ferðamála,- iðnaðar- og nýsköpunarráðherra að það sé ánægjulegt að geta boðið ferðamönnum upp á þá lúxusvöru sem íslenska vatnið er. 

„Við tökum á móti rúmlega tveimur milljónum ferðamanna til Íslands á ári og margir þekkja ekki gæði kranavatnsins. Það er til mikils að vinna að efla þekkingu á því og stuðla þannig að minni plastneyslu ferðamanna hér á landi,“ segir Þórdís Kolbrún.

Guðmundur Ingi Guðbrandsson, umhverfis- og auðlindaráðherra, segir að í verkefninu felist mikilvæg áskorun til ferðamanna um að draga úr plastneyslu og nota frekar margnota flöskur sem fylla má með kranavatni. 

„Um þessar mundir eru stigin fjölmörg mikilvæg skref við að minnka plastneyslu í heiminum. Kranavatnsverkefnið er eitt af þessum skrefum sem mun vonandi stuðla að ábyrgari hegðun ferðamanna á Íslandi og víðar um heiminn,“ segir Guðmundur.


Tengdar fréttir

Níu Íslendingar kynna Ísland frá A til Ö

Íslandsstofa kynnir herferðina "Ísland frá A til Ö“ þar sem íslenska tungumálið er nýtt til að auka vitund um Ísland sem góðan stað til að heimsækja, upprunaland gæða í matvælum, vörum og framleiðslu og tilvalinn stað fyrir fjárfestingar og viðskipti. Herferðin er undir merkjum Inspired by Iceland.




Fleiri fréttir

Sjá meira


×