Viðskipti innlent

Sigurður Nordal hættur á Morgunblaðinu

Kolbeinn Tumi Daðason skrifar
Sigurður Nordal hættir störfum um mánaðarmótin.
Sigurður Nordal hættir störfum um mánaðarmótin.
Sigurður Nordal lét í dag af störfum sem fréttastjóri viðskipta á Morgunblaðinu. Þetta tilkynnti hann samstarfsmönnum í tölvupósti í dag. Samkvæmt heimildum Vísis komst hann að samkomulagi um starfslok og hverfur til nýrra verka.

Sigurður hefur verið fréttastjóri viðskipta undanfarin fjögur og hálft ár. Hann er hagfræðingur að mennt og hefur meðal annars starfað sem framkvæmdastjóri Sinfóníuhljómsveitar Íslands og framkvæmdastjóri samskiptasviðs hjá Exista.

Sigurður er hagfræðingur með meistaragráðu frá Columbia háskóla í New York í Bandaríkjunum.

Stefán Einar Stefánsson.
Stefán Einar Stefánsson, viðskiptablaðamaður á Morgunblaðinu og fyrrverandi formaður VR, mun eftir því sem Vísir kemst næst taka við starfi Sigurðar.

Vísir greindi fyrr í dag frá því að Skapti Hallgrímsson, blaðamaður á Morgunblaðinu, hefði misst vinnuna á Morgunblaðinu eftir að hafa unnið þar alla starfsævi sína.

Þá munu fleiri blaðamenn hafa misst vinnuna og aðrir starfsmenn tekið á sig launalækkun samkvæmt heimildum Vísis.

Svanhvít Guðmundsdóttir, starfsmannastjóri Morgunblaðsins, tjáði Vísi að ekki væri um hópuppsögn að ræða. Hún vildi ekki tjá sig nánar um breytingarnar.

Áskriftargjald Morgunblaðsins hækkar um rúmlega fimm prósent um mánaðarmótin og er nú 6960 krónur.


Tengdar fréttir






Fleiri fréttir

Sjá meira


×