Innlent

Ó­hugnan­legar lýsingar í frelsis­sviptingar­máli: Leit stendur yfir að pari á þrí­tugs­aldri

Snærós Sindradóttir skrifar
Ljósmyndara Fréttablaðsins bar að garði þegar lögreglan handtók bílstjóra bifreiðar sem reyndi að flýja af vettvangi grunaður um frelsissviptingu í Fellsmúla um tvö leytið í gærdag. Um kvöldmatarleytið í gær var lögregla enn að leita að pari, búsettu í íbúðinni, þar sem frelsissviptingin á að hafa átt sér stað. Þolandinn slapp án alvarlegra áverka.
Ljósmyndara Fréttablaðsins bar að garði þegar lögreglan handtók bílstjóra bifreiðar sem reyndi að flýja af vettvangi grunaður um frelsissviptingu í Fellsmúla um tvö leytið í gærdag. Um kvöldmatarleytið í gær var lögregla enn að leita að pari, búsettu í íbúðinni, þar sem frelsissviptingin á að hafa átt sér stað. Þolandinn slapp án alvarlegra áverka. Vísir/GVA
Lögregla handtók tvo og hóf leit að pari í kjölfar þess að hafa leyst karlmann úr haldi í íbúð við Fellsmúla 9 í gær, en maðurinn hafði að eigin sögn verið frelsissviptur þar og misþyrmt í tvo sólarhringa.

Mikill titringur var í undirheimum Reykjavíkur í gær vegna málsins en sú saga gekk fjöllum hærra að málinu tengdist maður sem er nýkominn til landsins, grunaður um umfangsmikil fíkniefnaviðskipti í Paragvæ.

Grímur Grímsson yfirlögregluþjónn segir í samtali við Fréttablaðið ekkert benda til þess í rannsókn málsins að maðurinn tengist frelsissviptingunni á nokkurn hátt.

Sjá einnig: Konan gaf sig fram

Lögreglan stöðvaði för rauða jeppans með því að keyra í veg fyrir bílinn í tilraun bílstjórans til að flýja af vettvangi. Þá hafði bílnum að því er virðist verið ekið sem leið lá eftir göngustíg til þess að ökumaðurinn, sem er 33 ára, kæmist undan laganna vörðum. Fréttablaðið/GVA
Ljósmyndari Fréttablaðsins vitni að atburðarásinni

Málið var tilkynnt til lögreglu á öðrum tímanum í gær og fóru strax að minnsta kosti átta lögreglubílar á svæðið.

Ljósmyndari Fréttablaðsins átti leið um Háaleitisbraut á sama tíma og sá hvar þrír lögreglubílar stöðvuðu för dökkrauðs jeppa sem kom á miklum hraða út innkeyrslu við götuna. 

Svo virðist sem bíllinn hafi keyrt sem leið lá frá Fellsmúla, um göngustíg sem liggur á milli húsanna, í tilraun til að flýja af vettvangi. Ökumaður bílsins var handtekinn umsvifalaust.

Maðurinn sem mátti þola frelsissviptinguna gekk sjálfur út úr blokkinni með minniháttar áverka en einungis íkæddur nærbuxum. Hann hlaut aðhlynningu á sjúkrahúsi. Fréttablaðið/GVA
Ljósmyndari Fréttablaðsins fylgdi lögreglubíl áfram að Fellsmúla þar sem fleiri lögreglubílar og sjúkrabílar voru. Sjúkraflutningamenn leiddu þar manninn sem hafði mátt þola frelsissviptinguna út í sjúkrabíl á nærfötum einum klæða. Sjáanlegir áverkar á manninum voru litlir. 

Sagðist hafa verið barinn og brenndur

Ljósmyndari blaðsins varð var við mann fyrir utan sem lýsti atburðum þannig að maðurinn hefði verið bundinn og mátt þola barsmíðar og að vera brenndur. Sá maður var svo tekinn til hliðar af lögreglu og látinn gefa skýrslu um málið.

Lögregla hóf umsvifalaust rannsókn á málinu og rannsakaði meðal annars vettvanginn.

Þá hefur komið fram að maðurinn hafi sloppið frá kvölurum sínum með því að klifra á milli svala á efstu hæð hússins, yfir í næsta stigagang að Fellsmúla 11 og þaðan niður á þriðju hæð hússins. 

Þar var kona ein heima og gat hleypt manninum inn og hringt á lögreglu.

Íbúðin þar sem sagt er að manninum hafi verið haldið er á fjórðu hæð með svalir efst til hægri á þessari mynd. Maðurinn klifraði yfir næstu svalir og á svalirnar næstlengst til vinstri. Þar kom enginn til dyra svo maðurinn klifraði niður á svalirnar á þriðju hæð í stigaganginum við hliðina þar sem honum var hleypt inn. Fréttablaðið/Eyþór
Tveggja sólahringa frelsissvipting?

Þegar Fréttablaðið ræddi við lögreglu undir kvöld í gær stóð enn yfir leit að pari sem er búsett í íbúðinni. Leitað var að 26 ára karlmanni og 22 ára konu en parið er búsett í íbúðinni þar sem frelsissviptingin á að hafa átt sér stað. Þau voru ekki á vettvangi þegar lögreglu bar að garði. Eftir því sem komist verður næst hafa þau ekki hlotið refsidóma.

Fréttablaðið ræddi jafnframt við nágranna parsins sem sagði að þau hefðu flutt inn fyrir nokkrum mánuðum síðan og lítið ónæði hefði verið af þeim, hvorki hefði verið óeðlilega mikið um skemmtanahald né læti.

Þeir nágrannar sem Fréttablaðið ræddi við könnuðust ekki við að hafa heyrt læti og háreysti í tengslum við frelsissviptinguna en eins og áður segir segir þolandi að hún hafi staðið yfir í tvo sólarhringa.




Fleiri fréttir

Sjá meira


×