Bíó og sjónvarp

Andið eðlilega,hlýtur stuðning frá kvikmyndasjóðum Svíþjóðar og Belgíu

Guðrún Jóna Stefánsdóttir skrifar
Ísold Uggadóttir leikstýrir sinni fyrstu kvikmynd í fullri lengd.
Ísold Uggadóttir leikstýrir sinni fyrstu kvikmynd í fullri lengd. Visir/Anton

Kvikmyndagerðakonan Ísold Uggadóttir, er um þessar mundir að vinna að kvikmyndinni Andið eðlilega sem fer í tökur í september. Myndin tekur á samfélagslegu málefni, en þau hafa verið Ísold hugleikin. Nýlega hlaut hún stuðning frá bæði sænska kvikmyndasjóðnum og þeim belgíska, auk Kvikmyndamiðstöðvar Íslands sem áður hafði staðfest stuðning sinn.

„Vissulega er þetta spennandi ferli, en krefjandi engu að síður. Það er í mörg horn að líta og hlakka ég mest til að fara að leikstýra, í stað þess að tala sífellt um fjármögnun, undirbúning og ráðningar. En ég er óneitanlega þakklát fyrir það góða fólk sem ég hef þegar fengið til liðs við mig, og sýnist mér að þetta eigi ekki að geta klikkað,“ segir Ísold Uggadóttir kvikmyndagerðarkona, sem er um þessar mundir að vinna að sinni fyrstu kvikmynd í fullri lengd, Andið eðlilega, en hún lauk mastersnámi í leikstjórn og handritsgerð frá Columbia-háskóla í New York vorið 2011, þar sem hún var meðal annars valin besti kvenleikstjórinn.

Ísold Uggadóttir hefur unnið við kvikmyndagerð í fjölmörg ár og meðal annars leikstýrt fjórum stuttmyndum sem allar ferðuðust víða um heim og hlutu þar hin ýmsu verðlaun og viðurkenningar.

„Líklega var ég stoltust af því að hafa sýnt stuttmynd mína Revolution Reykjavík á hinni virtu kvikmyndhátíð Telluride, en ekki síður af sýningu hennar á MoMA-safninu 2012, í tengslum við hátíðina New Directors/New Films. Einnig var það mikið stökk þegar fyrsta stuttmynd mín, Góðir gestir, komst inna á Sundance-kvikmyndahátíðina árið 2007,“ segir Ísold.

„Andið eðlilega fer í tökur í september en myndin fléttar saman sögur tveggja ólíkra kvenna, annars vegar hælisleitanda frá Úganda sem verður strandaglópur í Keflavík vegna ófullnægjandi ferðaskilríkja og hins vegar einstæðrar móður á Reykjanesi sem starfar við vegabréfaskoðun á

Keflavíkurvelli, sem einmitt ber ábyrgð á handtöku hinnar fyrrnefndu,“ segir Ísold

„Með hlutverk hælisleitandans fer hin hæfileikaríka leikkona Babetida Sadjo frá Gíneu-Bissá, en hún hefur leikið í fjölmörgum kvikmyndum og leikverkum í Brussel við góðan orðstír,“ segir Ísold og bætir við að fljótlega verði tilkynnt hvaða íslenska leikkona muni fara með aðalhlutverkið á móti Babetidu. 


Tengdar fréttir

Hlýtur styrk upp á 80 milljónir króna

Ísold Uggadóttir fær vilyrði fyrir 80 milljóna framleiðslustyrk frá Kvikmyndamiðstöð Íslands. Kvikmyndagerðarkonur hafa fengið hlutfallslega fáa styrki.

Laðast að sögum um konur í krísu

Ísold Uggadóttir er flutt til Íslands eftir tíu ára dvöl í New York. Hún frumsýnir útskriftarmyndina sína á RIFF og er þegar farin að huga að sinni fyrstu kvikmynd í fullri lengd.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.