Lífið

Tyson er ekkert velkominn

Guðrún Ansnes skrifar
"Í dag er kominn tími fyrir "zero tolerance“, það er komið nóg af því að leyfa mönnum að njóta vafans trekk í trekk þegar þeir sýna engin merki um betrun.“
"Í dag er kominn tími fyrir "zero tolerance“, það er komið nóg af því að leyfa mönnum að njóta vafans trekk í trekk þegar þeir sýna engin merki um betrun.“ Mynd/aðsend

„Þetta er hreint út sagt óvirðing við konurnar sem hann hefur beitt ofbeldi og ákveðin tegund af þöggun á þeirra upplifun. Hans upphafning er þeirra þöggun. Þess vegna varð þessi undirskriftalisti til,“ segir Elísabet Ýr Atladóttir, ein meðlima hópsins Aktivistar gegn nauðgunarmenningu, sem stendur að baki undirskriftalista gegn komu boxarans Mikes Tyson til landsins með sýninguna The Undisputed Truth.

Í vikunni sem leið birtust fréttir þess efnis að þessi umdeildi íþróttamaður, sem jafnframt er dæmdur nauðgari, væri væntanlegur til landsins með haustinu, þar sem hann mun standa fyrir sýningu sem byggð er á ferli hans frá upphafi og verður ekkert látið ósagt.
„Þegar konur hafa loks rofið þögnina og talað opinskátt um kynbundið ofbeldi af öllum toga er óásættanlegt að dæmdur nauðgari og ofbeldismaður fái slíka heiðursmeðferð,“ segir meðal annars í yfirlýsingu hópsins á síðu undirskriftalistans.

Mike Tyson

Þykir heldur undarlegt að maður með nauðgunardóm á bakinu og ríkulega forsögu um ofbeldi í garð kvenna skuli upphafinn með þessum hætti og boðinn velkominn til landsins. 

Vonast Elísabet til að með undirskriftalistanum verði hægt að vekja fólk til umhugsunar: „því það er ómögulegt að maður eins og Mike Tyson sé settur upp sem einhvers konar fyrirmynd fyrir karla. Við berum öll ábyrgð á því að menn geti ekki sópað brotum sínum undir teppið. Með því að gefa pláss fyrir þessa sýningu værum við í raun að gefa samþykki fyrir því að hann tæki aldrei ábyrgð. Við værum að gefa í skyn að brot hans gegn þessum konum sé ekki nógu mikilvægt, ekki nógu alvarlegt, að okkur finnist hans ferill mikilvægari en þeirra réttlæti. Sem samfélag verðum við að gefa skýr skilaboð til ofbeldismanna að við tökum ekki þátt í þögguninni lengur.“ 


Nú þegar hafa rúmlega hundrað og fimmtíu skráð sig á listann sem fór í loftið á miðvikudag. „Við komumst vonandi í samband við skipuleggjendur fljótt svo við getum komið listanum áleiðis þegar söfnun lýkur,“ segir Elísabet að lokum.


Tengdar fréttir

Tyson gaf aðdáanda olnbogaskot

Það er nauðsynlegt að fara varlega að Mike Tyson. Það ættu allir að vita en það fannst maður sem vissi það ekki.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.