Körfubolti

Íslensku strákarnir voru mínir björgunarkútar

Eiríkur Stefán Ásgeirsson skrifar
Ragnar Nathanaelsson.
Ragnar Nathanaelsson. Vísir/Stefán
Fáir hafa vakið jafn mikla eftirtekt í Dominoʼs-deild karla það sem af er tímabili og miðherjinn Ragnar Nathanaelsson hjá Þór Þorlákshöfn. Það er varla annað hægt enda Ragnar 220 sentímetrar að hæð.

Það er augljóst á tölum Ragnars, sem má sjá hér fyrir neðan, að hann hefur látið vel til sín taka. Spekingar eru á einu máli um að Ragnar hafi stórbætt sig frá því að hann lék síðast með Þórsurum, veturinn 2013-14, en að því tímabili loknu hélt hann til Svíþjóðar.

Ragnar var hluti af Íslendinganýlendunni í Sundsvall á síðasta tímabili. Alls spiluðu fjórir Íslendingar með Drekunum þá, auk Ragnars voru það Hlynur Bæringsson, Jakob Örn Sigurðarson og Ægir Þór Steinarsson. Aðeins Hlynur er enn að spila með Sundsvall Dragons.

„Ætli þetta hafi ekki verið stærra stökk en ég bjóst við að það yrði,“ sagði Ragnar í samtali við Fréttablaðið. Ragnar fékk lítið að spila í Svíþjóð en var engu að síður valinn í íslenska landsliðið fyrir EM í sumar, þar sem hann var aftur í litlu hlutverki.

„Það var gott að vera með hina Íslendingana með mér í Svíþjóð. Þeir voru mínir björgunarkútar. Þeir pössuðu upp á að ég yrði ekki leiður og byrjaði að kenna sjálfum mér um. Þess í stað lögðu þeir áherslu á að ég myndi njóta þess að vera þarna, enda fullt af fólki sem myndi gefa mikið til að vera í sömu sporum og ég,“ segir Ragnar sem segist ekki efast um að reynslan muni nýtast honum vel fái hann aftur tækifæri til að fara í atvinnumennsku.

Fór að vorkenna sjálfum mér

Eftir fyrstu tvo leiki Íslands á EM, þar sem Ragnar spilaði aðeins tvær sekúndur í hvorum, leið honum ekki vel að eigin sögn.

„Ég gleymdi því að ég ætti að njóta þess að vera þarna og fór frekar að pæla í mínútunum. Ég hóf að vorkenna sjálfum mér í stað þess að njóta augnabliksins. Þarna var ég með íslenska landsliðinu á stórmóti og ansi margir sem hefðu viljað vera í mínum sporum.“

Ragnar fékk góð ráð frá sínu nánasta fólki og herbergisfélaga. Það dugði til að breyta viðhorfi hans, sem hann tileinkar sér enn í dag. „Ég fór fremur að einbeita mér að því hvað ég gæti gert til að hjálpa liðinu, þó það væri aðeins utan vallar. Þá byrjaði ég að öskra meira af bekknum og hvetja menn áfram. Það gerði það að verkum að mér leið mun betur.“

Hann segir að árið í Svíþjóð og með íslenska landsliðinu hafi gefið honum nýja sýn á íþróttina. „Ég virði körfuboltann og nýt þess að vera á gólfinu. Það er kannski ástæðan fyrir því að mér gengur betur. Ég er með góða stráka í kringum mig, góða þjálfara og góða áhorfendur. Ég leyfi leiknum að koma til mín fremur en að þvinga eitthvað fram sem veldur aðeins pirringi í sjálfum mér.“

Æfði eins og skepna í sumar

Ragnar segir að aðkoma tveggja manna hafi breytt miklu fyrir sig í sumar. Einar Árni Jóhannsson, þjálfari Þórs Þorlákshafnar, og Baldur Þór Ragnarsson hafi hjálpað honum heilmikið í sumar. Baldur er liðsfélagi Ragnars hjá Þór en einnig styrktarþjálfari íslenska landsliðsins.

„Ég æfði mig eins og skepna í sumar, strax þegar ég kom heim frá Svíþjóð. Þá fór ég að vinna í alls konar varnaræfingum og sprengiæfingum. Þjálfarateymið í landsliðinu er einnig öflugt og það passaði vel upp á að taka okkur stóru strákana til hliðar og vinna með okkur í séræfingum.“

Hann segir að litlir hlutir eins og að taka skotæfingu af vítalínunni eftir hverja æfingu hafi hjálpað sér. „Þó það hafi stundum ekki verið nema 20-30 skot. Það er strax byrjað að borga sig,“ segir Ragnar sem er nú með 74% skotnýtingu sem er bæting um rúm 20% frá því að hann spilaði síðast á Íslandi.

Hann segir að Þórsarar ætli sér að ná langt í vetur og að liðið sé rétt að byrja. „Ég kom ekki fyrr en um miðjan september inn í liðið og við erum enn að læra hverjir á aðra. Við verðum vonandi bara betri með hverjum leiknum.“

Ragnar lætur það ekki á sig fá þó svo að fáir hefðu reiknað með því að hann yrði jafn áberandi í deildinni og raunin varð. Hann er ekki að hugsa um að senda gagnrýnendum og spekingum skilaboð.

„Einu skilaboðin mín er að ég vil sýna fólki að ég nýt mín á vellinum.“

Toppframmistaða hjá Nat-vélinni

Ragnar Ágúst Nathanaelsson hefur verið með frábæra tölfræði í fyrstu fjórum umferðunum í Domino´s deild karla.

Hæsta framlag

1. sæti - 30,5 í leik

Besta skotnýting

2. sæti 56,6 prósent

Flest fráköst

1. sæti - 17,0 í leik

Flest sóknarfráköst

1.sæti - 8,0 í leik

Flest varin skot

1.sæti - 2,5 í leik

Flestar tvennur

1. sæti - 4 í 4 leikjum


Tengdar fréttir




Fleiri fréttir

Sjá meira


×