Íslenski boltinn

Fyrsta framherjaparið í áratug sem skorar þrennu

Óskar Ófeigur Jónsson skrifar
Kristján Flóki skoraði þrennu gegn ÍBV í síðustu umferð.
Kristján Flóki skoraði þrennu gegn ÍBV í síðustu umferð. vísir/ernir

FH-ingar eru á toppi Pepsi-deildar karla eftir þrjá sigra í röð og tvær þrennur framherja liðsins í undanförnum þremur leikjum. Það boðar gott fyrir toppliðið og framherjar liðsins ættu að spila með sjálfstraustið í botni í næstu leikjum liðsins.

Kristján Flóki Finnbogason skoraði þrennu í 4-1 sigri á ÍBV í Eyjum í 8. umferð og Steven Lennon skoraði þrjú mörk í 4-2 heimasigri á Leikni í 6. umferð. Báðir voru þeir að skora sína fyrstu þrennu í efstu deild í þessum leikjum.

Þetta er fyrsta framherjaparið í áratug sem skorar þrennu í úrvalsdeildinni eða síðan þeir Tryggvi Guðmundsson og Allan Borgvardt skoruðu báðir tvær þrennur fyrir FH-liðið sumarið 2005.

Sama lið hefur jafnframt ekki átt tvo leikmenn með þrennu síðan Óskar Örn Hauksson og Björgólfur Takefúsa skoruðu þrennur í tveimur síðustu umferðunum haustið 2009 en Óskar Örn lék þá á kantinum í 4-4-2 leikkerfinu og Björgólfur var í framlínunni með Guðmundi Benediktssyni.

Tryggvi og Allan voru báðir komnir með þrennu eftir áttundu umferð alveg eins og þeir Kristján Flóki og Lennon en samtals skoruðu þeir Tryggvi og Borgvardt 29 af 53 mörkum FH-liðsins um sumarið og voru tveir markahæstu leikmenn deildarinnar.

Kristján Flóki og Lennon hafa skorað 9 mörk saman og eru nú í öðru (Lennon, 5 mörk) og þriðja sæti (Kristján Flóki, 4 mörk) listans yfir markahæstu leikmenn Pepsi-deildarinnar. FH-liðið á nú fjórtán leiki eftir í Pepsi-deildinni og því næg tækifæri til að bæta við mörkum í sumar.

FH er reyndar aðeins fjórða félagið á þessari öld (frá og með 2000) sem hefur tvo leikmenn sem skora þrennu en framherjinn Sævar Þór Gíslason og miðjumaðurinn Sverrir Sverrisson skoruðu báðir þrennu fyrir nýliða Fylkis sumarið 2000.

Það þarf að fara allt til sumarsins 1997 til að finna fleiri liðsfélaga með þrennu en þá áttu Leiftur, KR og ÍBV öll tvo menn sem skoruðu þrjú mörk í leik í deildinni. Hjá öllum voru menn að skora þrennu af miðjunni.

Til að finna annað framherjapar með þrennu þurfum við því að fara 19 ár aftur í tímann eða til þess að þeir Bjarni Guðjónsson og Mihajlo Bibercic skoruðu báðir þrennur fyrir ÍA Íslandsmeistarasumarið 1996. Þeir voru báðir komnir með þrennu eftir 5. umferðina 24. júní og enduðu á því að skora saman 20 af mörkum Skagamanna í deildinni

Steven Lennon gerði þrennu gegn Leikni. vísir/stefán


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.