Innlent

Ekki hægt að hreinsa þungmálma úr Reykjavíkurtjörn

Garðar Örn Úlfarsson skrifar
Mikil umferð, fugladrit, brauðgjafir og skolp hafa mengað Tjörnina í Reykjavík sem er í slæmu ástandi.
Mikil umferð, fugladrit, brauðgjafir og skolp hafa mengað Tjörnina í Reykjavík sem er í slæmu ástandi. Fréttablaðið/Valli
Ástand Reykjavíkurtjarnar er slæmt segir í umsögn garðyrkjustjóra borgarinnar vegna tillögu um hreinsun Tjarnarinnar á vefnum Betri Reykjavík.

„Ég vil gjarnan að tjörnin verði hreinsuð, en hún hefur verið skítug mjög lengi. Vil að fuglarnir við tjörnina fái hreint vatn svo lífsskilyrði þeirra verði meiri,“ sagði í tillögunni sem 67 einstaklingar lýstu sig fylgjandi.

Í umsögn Þórólfs Jónssonar, garðyrkjustjóra Reykjavíkurborgar, segir að rannsókn á Tjörninni frá árinu 2008 hafi sýnt slæmar niðurstöður varðandi næringarefni og örverur en skárri með tilliti til þungmálma.

Stenst ekki markmið og talin í hættu

Og í nýrri stöðuskýrslu Umhverfisstofnunar um vatnasvæði á Íslandi segir að tjörnin í Reykjavík sé dæmi um tjörn á skipulögðu svæði þéttbýlis þar sem mögulegt aðrennslissvæði sé meira eða minna raskað vegna skipulags.

„Á heildina litið er ástand Tjarnarinnar slæmt og stenst hún því ekki umhverfismarkmið um gott ástand. Því er Tjörnin flokkuð í hættu,“ segir í skýrslu Umhverfisstofnunar.

„Lífræna mengunin var talin vera frá fuglalífi en einnig virtist skólp berast í aðrennsli Tjarnarinnar í Vatnsmýri. Í botnsetinu er einnig nokkuð af þungmálmum, meðal annars blýi, sinki og krómi sem stafar líklega helst af bílaumferð,“ vitnar garðyrkjustjórinn til rannsóknarinnar frá 2008.

Þórólfur Jónsson, garðyrkjustjóri Reykjavíkurborgar, segir unnið að hreinsun Tjarnarinnar.
Stærri mýrarsvæði eru jákvæð

Þórólfur segir ljóst að fuglalífið og brauðgjafir munu áfram skila miklu af lífrænum efnum í Tjörnina. „En síðan rannsóknin var gerð hefur farið fram leit að röngum lagnatengingum og töluverður árangur náðst þar. Mýrarsvæði í friðlandinu í Vatnsmýri hafa verið stækkuð sem ætti að hafa hreinsandi áhrif á vatnið,“ segir meðal annars um vatnsbúskapinn í umsögn garðyrkjustjórans.

Þá er bent á það í umsögninni að plöntuna síkjamara, sem hafi jákvæð áhrif á hreinleika vatns, hafi ekki verið að finna í Tjörninni 2008. „Gerðar hafa verið tilraunir með að planta henni og verður því haldið áfram. Þá er stefnt að því að ítreka hvatningu til borgarbúa um að minnka brauðgjafir, sérstaklega á vorin og sumrin,“ segir Þórólfur sem ekki leggur til umfangsmiklar framkvæmdir.

Slæmt að hreinsa mengað botnsetið

„Ekki er talið raunhæft að moka upp botnsetinu, bæði er það mjög dýrt en ekki síður þá myndi upprótið við framkvæmdina hafa mjög neikvæðar afleiðingar.“

Um áðurnefnda tillögu á vefnum betri byggð segir síðan í umsögn garðyrkjustjóra að hreinsun vatnsins hafi verið sinnt og að ýmsar aðgerðir séu í farvatninu. „Tillagan er því óþörf.“




Fleiri fréttir

Sjá meira


×