Þóra bjartsýn - Þrjár vikur langur tími í kosningabaráttu

Þóra Arnórsdóttir segist enn vongóð um góða árangur í forsetakosningunum þrátt fyrir að Ólafur Ragnar Grímsson mælist með langmest fylgi í nýjum könnunum. Þrjár vikur sé langur tími í kosningabaráttu.

Þóra var gestur Sigurjóns M. Egilssonar í þættium Sprengisandi á Bylgjunni í morgun. Eftir umræðuþætti í sjónvarpi í síðustu viku bætti Þóra aðeins við sig fylgi og í könnun sem birt var á fimmtudag mælist hún nú með 39 prósent fylgi. Ólafur Ragnar er samt enn með 7 prósentustiga forskot á hana samkvæmt sömu könnun.

Samkvæmt nýrri netkönnun sem birtist í morgun er Ólafur Ragnar með 50 prósent fylgi. Þóra kemur þar á eftir með 33,2 prósent. Þóra hefur samt ekki sérstakar áhyggjur af þessu.

„Bæði það að skoðanakannanirnar eru svo ægilega misvísandi. Það eru tvær kannanir kannski gerðar á dag sem sýna gjörólíkar niðurstöður. Og það að það eru þrjár vikur. Ég finn bara svo ofboðslegan kraft í mínu fólki. Ég held líka að þetta hafi verið svolítið spark í rassinn fyrir okkur, af því við fórum svo vel af stað. Nú er alls kyns fólk að stíga fram og segja: Ég vil vinna. Hvað á ég að gera. Þannig að ég hef fulla ástæðu til að vera bjartsýn. Þrjár vikur er langur tími í kosningabaráttu," sagði Þóra.

Þóra segir að grundvallar munur sé á henni og Ólafi Ragnari.

„Ég er bara ekki viss um að það sé heppilegt að forsetinn sé mjög upptekinn af valdi og valdsviði sínu. Ekki frekar en ég tel að það sé heppilegt að hann taki afstöðu í stórum pólitískum deilumálum. Forsetinn hefur næg verkefni þó hann sé ekki að túlka valdsvið sitt víðara en hefur tíðkast."

sagði Þóra Arnórsdóttir, í þættinum Sprengisandi á Bylgjunni í morgun.