Íslenskur flugvirki slapp naumlega frá mannræningjum

Flugvirkinn Ellert Ellertsson lenti í hryllilegri lífsreynslu í Venesúela á föstudaginn þegar þrír menn reyndu að ræna honum í höfuðborg landsins, Caracas.

Ellert, sem er flugvirki hjá Icelandair, kom til landsins á föstudaginn en fyrirtækið er með þjónustusamninga þar í landi samkvæmt kvöldfréttum RÚV.

Þegar Ellert var kominn á flugvöllinn beið enginn bíll eftir honum eins og vanalega. Eftir nokkra stund kom til hans maður og sagðist vera bílstjórinn hans. Ellert hringdi þá í tengilið sinn og í kjölfarið settist hann upp í bílinn og þeir óku af stað.

„Síðan virðast tvær grímur hafa runnið á tengiliðinn," sagði Ellert í viðtali á RÚV í kvöld og bætti við að tengiliðurinn hefði hringt til baka. Þá hefði hann rætt stuttlega við ökumanninn. Síðan fékk Ellert símann og þá sagði tengiliðurinn einfaldlega við hann: „Dont leave the airport."

„En þá var það náttúrulega of seint," sagði Ellert sem hafði þá ekið í um tíu mínútur með mönnunum.

Það varð honum svo til happs að aurskriða hafði falliið á veginn sem mannræningjarnir óku. Bíllinn festist því í umferðateppu. Þá segist Ellert ekki hafa ætlað að láta bjóða sér þetta lengur og rauk út úr bílnum. Hann heimtaði farangurinn sinn og símann.

Fullt af bílum voru allt í kring og fjöldinn allur af fólki. Ellert segist hafa snúið sér að hvítum manni sem ók Lexus-bifreið og sagt honum að það væri verið að ræna honum.

„Þá skrúfaði hann bara upp rúðuna og ók í burtu," sagði Ellert.

Mannræningjarnir reyndu að lokka hann aftur í bílinn. Þeir sögðu honum að hótelið væri rétt hjá. Ellert lét sem betur fer ekki segjast heldur náði í farangur sinn og tók leigubíl á hótelið. Síðan lét hann lögregluna vita sem rannsakar málið.

Samkvæmt kvöldfréttum RÚV eru mannrán nokkuð tíð í landinu. Árlega eru um níu þúsund einstaklingum rænt. Þá hafa hraðrán færst í aukana, en þá er fólk lokkað upp í bíla og þeim rænt í kjölfarið. Svo er fjölskyldan krafin um 25 þúsund dollara eða um þrjár milljónir króna.

„Maður hefur heyrt að svona sjokk komi seinna. Það verður þá bara að koma í ljós," sagði Ellert að lokum.