Mannskæðir bardagar í Mogadishu

Harðir bardagar hafa geysað í morgun í Mogadishu, höfuðborg Sómalíu. Minnst sjö hafa fallið í bardögum á milli hersveita ríkisstjórnar og uppreisnarmanna. Þetta er mesta mannfall í bardögum í borginni síðan í desember. Um 1200 hermenn Afríkubandalagsins eru nú komnir til Sómalíu til að reyna að koma skikk á ástandið.

Átök hafa magnast í landinu undanfarnar vikur og tugir hafa farist í þeim. Eþíópískar hersveitir hafa verið til aðstoðar stjórnarhermönnum síðan í desember en það virðist ekki duga til þess að hafa hemil á uppreisnarmönnum. Sameinuðu þjóðirnar áætla að um 40 þúsund íbúar Mogadishu hafi flúið af vettvangi á allra síðustu vikum vegna átakanna.