Kjarnorkuviðræður í hættu

Nú virðist sem viðræður um kjarnorkumál Norður-Kóreumanna séu að sigla í strand. Það sem strandar á er að stjórnvöld í Pyongyang hafa enn ekki fengið aðgang að 25 milljónum dala sem þau eiga á bankareikning í Macau, en höfðu verið frystar af Bandaríkjamönnum. Norður-Kóreumenn segja nú að ekki verði frekar rætt um afvopnun fyrr en peningarnir hafa verið millifærðir.

Christopher Hill, aðalsamningamaður Bandaríkjanna segir þó að allt verði gert til að Norður-Kóreumenn fái peningana sína sem fyrst til að hægt verði að standa við samninga sem gerðir voru í byrjun febrúar og gera ráð fyrir að Norður-Kóreumenn slökkvi á kjarnaofni sínum í Yongbon um miðjan næsta mánuð.