Banna nemendum að ganga með slæður

Breska ríkisstjórnin hefur gefið það út að skólar þar í landi séu í fullum rétti að banna nemendum að bera höfuðslæður, líkt og margar múslimakonur gera.

Reglan er að ef kennarar meta það svo að slæðurnar skaði öryggi eða námsgetu barna megi banna þær, þó að höfðu samráði við foreldra. Hingað til hefur skólum verið ráðlagt að leyfa trúarlegan klæðnað. Slæðurnar eru taldar koma í veg fyrir að kennarar geti þekkt þá úr hópnum sem að fara inn á skólalóðina í óleyfi og eins gert þeim erfiðara um vik að halda uppi aga í bekkjum.

Um 1,6 milljónir múslima búa í Bretlandi og hafa nýju reglurnar vakið mikla umræðu um umburðarlyndi gagnvart trúarbrögðum í landinu. Tony Blair forsætsráðherra hefur lýst þeirri skoðun sinni að honum þyki höfuðslæður vera tákn aðskilnaðar og misréttis.

Það vakti mikla reiði og umtal í Frakklandi fyrir um þremur árum þegar höfuðslæður voru bannaðar þar og um leið bönnuðu Frakkar þá kollhúfur gyðinga og stóra kristna krossa. Talið er næsta víst að breskir múslimar muni feta í fótspor franskra og mótmæla nýju löggjöfinni.