Stjórnlaust kynþáttaníð á Spáni

Ekkert lát er á kynþáttaníðinu á fótboltavöllum á Spáni.  Í gærkvöldi var Barcelonamaðurinn, Samuel Etoo, skotspónn um 50 stuðningsmanna Getafe.  Í hvert sinn sem Eto, sem er knattspyrnumaður Afríku snerti boltann, fékk hann dónalegar kveðjur frá fótboltabullunum.  Barcelona vann 2-1 og jók forskot sitt í spænsku úrvalsdeildinni. Rafael Marquez og Deco skoruðu mörk Barcelona en Rúmeninn Gheorghe Craioveanu mark Getafe.  Eftir leikinn gagnrýndi Craioveanu markaskorari Getafe stuðningsmenn liðsins og sagði við fréttamenn að hann hefði ekki viljað vera í sporum Kamerúnans Eto.  “Hegðun stuðningsmanna liðsins gagnvart Eto var ekki til fyrirmyndar”, sagði Rúmeninn.  Atvikið í gærkvöldi er eitt margra að undanförnu þar sem kastljósinu er beint að litarhafti blökkumanna.  Knattspyrnusamband Evrópu sætir nú gagnrýni fyrir að taka ekki fast á málum. Tveir aðrir leikir voru í spænska boltanum í gærkvöldi, Athletic Bilbao vann Racing Santander 3-0 og Espanol lagði Atletico Madríd að velli með tveimur mörkum gegn einu.  Katalóníuliðin Barcelona og Espanol eru í tveimur fyrstu sætunum, Barcelona er með 32 stig en Espanol 23.  Real Madríd getur endurheimt annað sætið en liðið mætir í dag Levante í leik sem sýndur verður beint á Sýn klukkan 18. Strax á eftir eða laust fyrir klukkan 20 verður skipt yfir til Ítalíu og leikur Inter og Juventus í úrvalsdeildinni verður sýndur.  Tveir leikir voru í ítölsku deildinni í gærkvöldi, Roma burstaði nýliða Siena 4-0 á útivelli, Vincenzo Montella og Francisco Totti skoruðu tvö mörk hvor.  Þá vann Udinese, Livorno 2-1 á útivelli.  Montella er núna markahæstur á Ítalíu með 11 mörk en þeir Adriano hjá Inter og Andrej Schevshenko hjá AC Milan hafa skorað 9 mörk.