Innlent

Ráðuneytið segir Gunnstein vanhæfan

Gunnsteinn Sigurðsson, bæjarfulltrúi Sjálfstæðismanna og skólastjóri í Lindaskóla.
Gunnsteinn Sigurðsson, bæjarfulltrúi Sjálfstæðismanna og skólastjóri í Lindaskóla.

Samgönguráðuneytið hefur úrskurðað fyrrverandi formann Íþrótta - og tómstundaráðs í Kópavogi, Gunnstein Sigurðsson, vanhæfan til að fjalla um ráðningu í stöðu verkefnisstjóra æskulýðs- og tómstundarmála í Kópavogi. Bæjarfulltrúar Samfylkingarinnar kærðu ákvörðun ÍTK til ráðuneytisins á sínum tíma því þau töldu óeðlilegt að Gunnsteinn tæki þátt í ráðningaferlinu vegna tengsla sinna við einn umsækjandann.

Viðkomandi umsækjandi hafði verið undirmaður Gunnsteins, sem er skólastjóri í Lindaskóla, til margra ára auk þess sem hann var meðmælandi hennar á umsókn um starfið og mælti hann með henni í starfið þegar ákvörðun var tekin um ráðningu.

„Þetta er það sem við sögðum allan tímann," segir Guðríður Arnardóttir oddviti Samfylkingarinnar í Kópavogi en hún kærði ráðninguna ásamt Hafsteini Karlssyni flokksbróður sínum. „Ráðuneytið fellst á rök okkar þess efnis að það hafi verið óeðlilegt að hann tæki afstöðu til umsóknarinnar." Ráðuneytið tók ekki afstöðu til þess hvort ráðningin sjálf hafi verið ólögmæt eða hvort hæfasti umsækjandinn hefði verið ráðinn. „Ég vil ítreka að ég ber fullt traust til þessarar konu sem var ráðin í starfið, þetta snýst ekki um hana. Þetta snýst um að Gunnsteinn skuli ekki hafa séð sóma sinn í því að víkja sæti," segir Guðríður.

Guðríður Arnardóttir, oddviti Samfylkingarinnar í Kópavogi.

Ráðningin var þó einnig umdeild á sínum tíma þar sem gengið var fram hjá umsækjanda með meiri menntun og reynslu í þessum tiltekna málaflokki. Í umsögn ráðuneytisins segir meðal annars að Gunnsteinn hafi verið vanhæfur til að taka þátt í ráðningaferlinu með þeim hætti sem það fór fram, „þar sem hann var jafnframt meðmælandi eins umsækjanda og yfirmaður hennar. Honum var því óheimilt að taka þátt í afgreiðslu málsins með tillögu um ráðningu til bæjarstjórnar." Ráðuneytið fellst því á körfu kærenda um vanhæfi formannsins vegna ráðningarinnar en telur ekki sýnt fram á að ráðninguna eigi að ógilda.

„Þetta er fyrst og fremst sorgleg niðurstaða," segir Guðríður, „að kjörinn fulltrúi átti sig ekki á þessari stöðu sem þarna kom upp, sérstaklega í ljósi þess að við bentum honum á þetta í umsóknarferlinu en hann hlustaði ekki á það," segir Guðríður Arnardóttir, oddviti Samfylkingarinnar í Kópavogi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.