Erlent

„Ég get ekki sofið og er alltaf uppspennt“

Samúel Karl Ólason skrifar
Jasídi sem slapp úr haldi vígamanna Íslamska ríkisins í fyrra.
Jasídi sem slapp úr haldi vígamanna Íslamska ríkisins í fyrra. Vísir/AFP
Þýskir sálfræðingar vilja þjálfa heimamenn í Írak í því að aðstoða Jasída, sem voru í haldi Íslamska ríkisins, að komast í gegnum þau sálfræðilegu vandamál sem fylgja slíkum óförum. Þúsundir kvenna voru misnotaðar og beittar ofbeldi í allt að tvö og hálft ár.

Sálfræðingurinn Jan Kizilhan er í forsvari fyrir verkefnið en í fyrra voru um ellefu hundruð jasídar, konur og stúlkur, fluttar til Þýskalands til meðferðar. Meðferðin var fjármögnuð af þýska héraðinu Baden Wüerttemberg og reyndist vel. Kizilhan rekur uppruna sinn til Jasída, en flutti til Þýskalands þegar hann var sex ára gamall.

Nú um mánðarmótin verður sérstök miðstöð opnuð í Dohuk, nærri Mosul, í Írak. Þar verða heilbrigðisstarfsmenn þjálfaðir í því að hjálpa fólki eins og þeim konum sem voru í haldi ISIS-liða.

Aðeins 26 sálfræðingar fyrir sex milljónir manna

Í dag eru einungis 26 sálfræðingar starfandi innan sjálfstjórnarsvæðis Kúrda í Írak. Þar búa um 5,5 milljónir og rúmlega 1,5 milljón flóttamanna. Enginn sálfræðinganna hefur fengið þjálfun í því að bregðast við áföllum eins og þeim sem um ræðir hér.

Þegar ISIS-liðar sóttu fram í Írak sumarið 2014 voru þúsundir jasída myrtir og hafa samtökin verið sökuð um að fremja þjóðarmorð á jasídum. Þúsundir kvenna og stúlkna voru teknar sem þrælar og hafa þær verið seldar á milli vígamanna sem hafa beitt þær miklu ofbeldi. Kynferðislegu, andlegu og líkamlegu.

Sjá einnig: Raunir Jasída: Kynlífsþrælkun, þjóðarmorð og misþyrming.

Talið er að um 1.900 jasídar hafi flúið frá ISIS, en enn eru minnst þrjú þúsund konur og börn í haldi.

Fjölskyldur aðskildar

Blaðamenn AP fréttaveitunnar ræddu við unga konu sem slapp úr haldi ISIS-liða í desember. Perwin Ali Baku var í haldi í tvö ár og var seld og keypt á milli vígamanna sem misnotuðu hana kynferðislega og líkamlega. Hún segist ekki geta sofið og hún sé alltaf uppspent. Perwin er að leita sér hjálpar og bindur vonir við hina nýju miðstöð í Dohuk.

Önnur kona sagði blaðamönnum frá því að hún hefði verið neydd til að vinna á sveitabýli um tíma, eftir að hún lenti í haldi ISIS ásamt börnum sínum. Elstu drengirnir hennar, 14 ára, 12 ára og 10 ára drengur með þroskahömlun, voru teknir af henni og hún var barin illa fyrir að reyna að stöðva það.

Konan vildi eingöngu notast við nafnið Gorwe þar sem fjölskyldumeðlimir hennar eru enn í haldi ISIS.

Hún var síðan flutt á brott ásamt tveimur ungum börnum sínum og endaði á uppboði þar sem vígamenn keyptu kynlífsþræla. Á næstu mánuðum var hún keypt af fjölda vígamanna sem nauðguðu henni ítrekað.

Síðasti eigandi Gorwe seldi hana þegar ungur maður keyrði upp að þeim og virtist hafa áhuga á sjö ára dóttur hennar.

„Hann sagði: Mér lýst vel á þessa stelpu. Hárið á henni er flott. Ég skal kaupa hana.“

Veit ekki hvar fimm úr fjölskyldunni eru

Maðurinn ungi keypti konuna og börnin hennar tvö og þau settust upp í bílinn hjá honum. Þar tilkynnti hann konunni að hann ynni fyrir Abu Shujaa. Sá er Jasídi sem hefur tekist að smygla fjölda fólks úr haldi ISIS-liða.

Þrátt fyrir að vera laus úr haldi saknar Gorwe margra. 24 meðlimir fjölskyldu hennar og ættingjar voru handsamaðir af ISIS-liðum árið 2014 þegar þau voru á flótta undan sókn þeirra. Þar af hafa einungis fjórtán sloppið og allt eru það konur og börn.

Mennirnir voru aðskildir frá konum og börnum og fimmtán ára dóttir hennar var svo tekin af henni. Gorwe veit hvorki hvar dóttir sín er niðurkomin í dag né veit hún hvar eiginmaður hennar og þrír synir þeirra eru.

„Ég mun aldrei gleyma því sem kom fyrir okkur þar sem þeir seldu okkur, keyptu og börðu. Ég husa sífellt um það. Enginn getur gleymt þessu þjóðarmorði, og sérstaklega þeim sem voru handsamaðir. Þeim verður aldrei gleymt. Hvernig er hægt að gleyma því?“ spurði Gorwe.


Tengdar fréttir




Fleiri fréttir

Sjá meira


×