Enski boltinn

Zlatan hetjan er Manchester United vann deildarbikarinn í fimmta sinn | Sjáðu mörkin

Kristinn Páll Teitsson skrifar
Rooney fagnar ásamt liðsfélögum sínum á Wembley.
Rooney fagnar ásamt liðsfélögum sínum á Wembley. vísir/getty
Manchester United er enskur deildarbikarmeistari í fimmta skiptið í sögu félagsins eftir 3-2 sigur á Southampton í úrslitaleiknum á Wembley en það var hinn sænski Zlatan Ibrahimovic sem skoraði fyrsta og síðasta markið í leiknum og tryggði Manchester United sigurinn.

Var þetta fyrsti úrslitaleikur Manchester United undir stjórn Jose Mourinho en það tók portúgalska knattspyrnustjórann ekki langan tíma að vinna fyrsta titilinn sem stjóri liðsins.

Dýrlingarnir frá Southampton byrjuðu leikinn betur og virtust hafa komist yfir í fyrri hálfleik þegar Manolo Gabbiadini kom boltanum í netið en hann var ranglega dæmdur rangstæður.

Stuttu síðar kom Zlatan Rauðu djöflunum yfir með aukaspyrnu af 25 metra færi en hægt er ða setja spurningarmerki við Fraser Forster í marki Southampton í markinu.

Stuttu fyrir lok fyrri hálfleiks bætti Jesse Lingard við öðru marki Manchester United með snyrtilegri afgreiðslu eftir sendingu frá Marcus Rojo en Gabbiadini kom Southampton aftur inn í leikinn með marki í uppbótartíma í fyrri hálfleik.

Gabbiadini var aftur á ferðinni í upphafi seinni hálfleiks þegar hann stýrði boltanum í netið frá vítateigslínunni en Southampton virtust vera líklegri til að vinna leikinn í seinni hálfleik. Komst Oriel Romeau næst því að koma Southampton yfir þegar skalli hans hafnaði í stönginni en Zlatan átti eftir að láta til sín taka.

Skallaði hann þá fyrirgjöf Ander Herrera í netið af stuttu færi eftir fína sókn Manchester United en miðverðir Southampton gleymdu sér í aðeins nokkrar sekúndur og sá sænski var fljótur að refsa.

Fimmti deildarbikarmeistaratitill Manchester United staðreynd og þrátt fyrir að Southampton hafi stýrt leiknum lengst af voru það lærisveinar Jose Mourinho sem fögnuðu sigrinum og taka á móti titlinum.

Zlatan kemur Manchester United yfir: Lingard bætir við: Dýrlingarnir minnka muninn: Dýrlingarnir jafna: Sigurmark Zlatans:



Fleiri fréttir

Sjá meira


×