Enski boltinn

Xavi: Auðvitað mun Pep slá í gegn á Englandi

Tómas Þór Þórðarson skrifar
Pep Guardiola verður á Englandi næsta vetur.
Pep Guardiola verður á Englandi næsta vetur. vísir/getty
Xavi Hernández, fyrrverandi leikmaður Barcelona, er handviss um að Pep Guardiola mun slá í gegn á Englandi en hann staðfesti á dögunum að hann mun semja við enskt lið í sumar.

Guardiola verður samningslaus hjá Bayern München í sumar og hefur verið sterklega orðaður við Manchester City, en það mun fá harða samkeppni um undirskrift Spánverjans frá Manchester United og Chelsea.

Xavi, sem vann spænsku deildina í þrígang og Meistaradeildina tvisvar sinnum undir stjórn Guardiola, segir að hann muni standa sig hvert sem hann fer.

„Þetta er ekki spurning um hvort hann muni slá í gegn. Auðvitað mun hann gera það eins og hvert sem hann fer,“ segir Xavi í viðtali við enska blaðið Daily Mirror.

„Það hafa allir séð hvernig Barcelona og Bayern-liðin hans spila fótbolta. Hugmyndafræði hans er eitthvað sem stuðningsmönnunum líkar en Pep er samt bara svo miklu meira en það.“

Xavi segir að Guardiola hafi lengi dreymt um að þjálfa á Englandi. „Þetta var ekki spurning um hvort heldur hvenær Pep myndi þjálfa á Englandi. Þegar ég var hjá Barcelona var hann alltaf að tala um ensku úrvalsdeildina og virðinguna sem hann bar fyrir liðunum þar, leikmönnunum og hraða leiksins á Englandi,“ segir Xavi Hernández.




Fleiri fréttir

Sjá meira


×