Körfubolti

Westbrook með sjöundu þrennuna á tímabilinu | Myndbönd

Tómas Þór Þórðarson skrifar
Russell Westbrook hefur farið á kostum á tímabilinu.
Russell Westbrook hefur farið á kostum á tímabilinu. vísir/getty
Cleveland Cavaliers vann fimmta leikinn í röð í NBA-deildinni í körfubolta í nótt þegar liðið lagði Indiana PAcers, 111-106, á útivelli, en þetta var fyrsti sigur Cleveland í Indianapolis í sex ár.

Staðan var jöfn eftir venjulegan leiktíma, 96-96, en áður en framlengingin hófst hélt leikstjórnandinn Kyrie Irving mikla eldmessu yfir sínum mönnum og hvatti þá til að ganga frá leiknum.

Hann setti svo fordæmið sjálfur með að skora sex af 25 stigum sínum í leiknum í framlengingunni og hitta úr fjórum vítaskotum á lokasekúndunum. Auk stiganna 25 gaf hann sjö stoðsendingar.

Hann fékk svo sannarlega fína hjálp í gærkvöldi því allt byrjunarlið Cleveland skoraði yfir 14 stig. LeBron James var næst stigahæstur með 24 stig, tólf fráköst og sex stoðsendingar.

Russell Westbrook, leikstjórnandi Oklahoma City Thunder, var í miklu stuði í nótt þegar hans menn unnu Washington Wizards á heimavelli, 114-98.

Westbrook hlóð í myndarlega þrennu og var með 17 stig, þrettán fráköst og ellefu stoðsendingar, en hann hefur sjaldan spilað betur á móti John Wall, hinum annars öfluga leikstjórnanda Washington.

Þetta var 26. þrenna Westbrook á ferlinum. Hann er búinn að ná sjö þrennum á þessari leiktíð, þar af núna í tveimur leikjum í röð og í fjórum leikjum af síðustu tíu.

Kevin Durant var þó stigahæstur í liði OKC með 28 stig auk þess sem hann tók níu fráköst, en Serge Ibaka lagði einnig sín lóð á vogarskálirnar með 19 stigum og tíu fráköstum.

LaMarcus Aldrige fór svo fyrir San Antonio Spurs sem vann Orlando Magic á heimavelli, 107-92, en Spurs-liðið er enn ósigrað á heimavelli á þessari leiktíð.

Kraftframherjinn öflugi sem kom frá Portland fyrir tímabilið skoraði 28 stig og tók fjögur fráköst, en af byrjunarliði Spurs kom Kawhi Leonard næstur með tíu stig. Patty Mills kom sterkur inn af bekknum og skoraði 22 stig.

Úrslit næturinnar:

Indiana Pacers - Cleveland Cavaliers 106-111

Brooklyn Nets - Detriot Pistons 100-105

Atlanta Hawks - Dallas Mavericks 112-97

New Orleans Pelicans - Memphis Grizzliez 95-110

OKC Thunder - Washington Wizards 114-98

San Antonio Spurs - Orlando Magic 107-92

Denver Nuggets - Toronto Raptors 112-93

Utah Jazz - Chicago Bulls 105-98

Sacramento Kings - Milwaukee Bucks 111-104

Staðan í deildinni.

Ibaka treður yfir Gortat:
NBA



Fleiri fréttir

Sjá meira


×