Virkjanastarfsemi verður í meirihlutaeigu REI

Í fréttatilkynningu sem Reykjanesbær sendi frá sér í  í morgun segir að samkeppnisrekstur, s.s. virkjanastarfsemi, verði í meirihlutaeigu REI.
Stefnt er að því að Hitaveita Suðurnesja muni með stjórnendum sínum og öllu starfsfólki einnig sinna framleiðsluþættinum, annars vegar sem eigandi dreifikerfa og hins vegar sem rekstraraðili á virkjunum.
Gert er ráð fyrir að Reykjanesbær eigi einnig hlut í félagi um framleiðslumannvirkin en þau yrðu eins og áður segir að meirihluta í eigu REI.

Annars er tilkynningin svohljóðandi:

Stefnt að meirihlutaeign Reykjanesbæjar í Hitaveitu Suðurnesja hf.

Samhliða sameiningu stærstu útrásafyrirtækja landsins í jarðvarmanýtingu á erlendri grund, skapast tækifæri til að vinna í anda hugmynda um uppskiptingu á innlendum orkufyritækjum sem annars vegar snýr að einkaleyfabundinni starfsemi s.s. rekstri dreifikerfa sveitarfélaga og smásölu til þeirra og hins vegar að samkeppnis- og áhætturekstri, s.s. framleiðslu raforku og heildsölu hennar.

Reykjanesbær hefur unnið að samkomulagi við hina nýju eigendur REI sem miðar að því að  Reykjanesbær eignist meirihluta í Hitaveita Suðurnesja hf. sem eigi dreifikerfi sveitarfélaganna og sinni smásölu inn á kerfin.   Þannig  er  tryggt  að þjónusta við almenning s.s. vatn, hiti, rafmagn og frárennsli verði að meirihluta í almannaeigu.

Samkeppnisrekstur, s.s. virkjanastarfsemi, verður í meirihlutaeigu REI.
Stefnt er að því að Hitaveita Suðurnesja muni með stjórnendum sínum og öllu starfsfólki einnig sinna framleiðsluþættinum, annars vegar sem eigandi dreifikerfa og hins vegar sem rekstraraðili á virkjunum. Þetta þýðir að starfsmenn munu finna fyrir litlum breytingum á högum sínum en líklegt er að fjölga þurfi fólki.

Gert er ráð fyrir að Reykjanesbær eigi einnig hlut í félagi um framleiðslumannvirkin en þau yrðu eins og áður segir að meirihluta í eigu REI. Kjósi önnur sveitarfélög á svæðinu að leggja inn önnur dreifikerfi í Hitaveitu Suðurnesja s.s. vatns- og fráveitur, stendur til að bjóða þeim að fylgja því eftir með eignaraðild í Hitaveitu Suðurnesja hf.

Starfsemi í nýjum höfuðstöðvum á Fitjum
Bæði Hitaveita Suðurnesja hf og starfshluti REI, sem snýr að virkjunum á svæðinu, yrðu staðsett í nýjum höfuðstöðvum Hitaveitu Suðurnesja hf að Fitjum.

Líklegt að fjölga þurfi starfsfólki
Í viðræðum við forsvarsmenn REI hefur komið skýrt fram að vilji er til að auka starfsemi REI á svæðinu, sérstaklega í tengslum við þróunarverkefni á sviði viðskiptatækifæra og tækni. Vegna útrásarverkefna REI og tengsla fyrirtækisins við Hitaveitu Suðurnesja hf. er líklegt að starfsfólki fyrirtækisins muni fjölga, sem gætu þá tengst tímabundið þróunarverkefnum, ekki síst erlendis. Þá eru allir samstarfsaðilar áhugasamir um að efla rannsóknar- og þróunarstarf í tengslum við háskólafélagið Keili á Vallarheiði. Nú er unnið að útfærslu nánara samkomulags á milli Reykjanesbæjar, Hitaveitu Suðurnesja hf. og REI um framangreind mál og stefnt að því að tillögur liggi frammi fyrir næsta bæjarstjórnarfund þann 16. okt. n.k..