Vilja vita hvort hafnfirskar löggur muni bera vopn

Bæjarráð Hafnarfjarðar hefur farið fram á að bæjarstjóri leiti skýringa og svara við því hvort lögreglumenn í bænum muni bera skotvopn við almenn störf. Ályktun þess efnis var samþykkt á fundi bæjarráðs í gær.

Skiptar skoðanir eru um nýtilkomna gjöf Norðmanna til Íslendinga, 250 hríðskotabyssur. Í tilkynningu sem Landhelgisgæslan sendi frá sér í gær kemur raunar fram að um þriðju gjöf Norðmanna á fjórum árum sé að ræða. 50 hríðskotabyssur bárust árið 2011 og tíu í fyrra. Heildarfjöldinn er því 310 hríðskotabyssur. Segir í tilkynningu gæslunnar að vopnin séu ekki öflugri en þau sem hafi verið í vopnasafni gæslunnar til þessa.

Lögreglan hefur staðfest að fjöldi lögreglumanna hefur farið á námskeið og æfingu í að skjóta með byssunum á geymslusvæði gæslunnar á Suðurnesjum. Vopnin eiga að vera til staðar hjá öllum embættum lögreglunnar á landinu.

„Í ljósi umræðu um vopnaburð lögreglu felur bæjarráð bæjarstjóra að leita skýringa og svara við því hvort breytingar hafi orðið á þeirri grundvallarstefnu að lögregla skuli ekki vera búin skotvopnum við almenn störf sín,“ segir í ályktun bæjarráðs.

Telur bæjarráð ástæðu til að árétta þá afstöðu bæjaryfirvalda í Hafnarfirði að ekki sé rétt að gera breytingar á þeirri meginreglu nema að undangenginni opinni umræðu í samfélaginu og að höfðu samráði við alla hlutaðeigandi.

Rósa Guðbjartsdóttir, Kristinn Andersen, Guðlaug Kristjánsdóttir, Gunnar Axel Axelsson, Adda María Jóhannsdóttir og Guðrún Ágústa Guðmundsdóttir sátu fundinn auk Haralds L. Haraldssonar bæjarstjóra og Kristjáns Sturlusonar sviðsstjóra.