Innlent

Vilja leyfa fyrirtækjum að gefa börnum gjafir með forvarnargildi

Aðalsteinn Kjartansson skrifar
Hildur Sverrisdóttir borgarfulltrúi mælti fyrir breytingunum.
Hildur Sverrisdóttir borgarfulltrúi mælti fyrir breytingunum. Vísir/STEFÁN
Borgarfulltrúar Sjálfstæðisflokksins vilja að fyrirtækjum, félagasamtökum og stofnunum verði leyft að gefa skólabörnum í borginni gjafir, svo lengi sem að hún hefur fræðslu-, forvarnar- eða öryggisgildi. Fulltrúarnir lögðu þetta til á borgarstjórnarfundi í dag.

Hildur Sverrisdóttir borgarfulltrúi talaði fyrir tillögunni. Í fréttatilkynningu frá borgarstjórnarflokknum er haft eftir henni að hún telji það eiga að vera vel hægt að finna meðalhóf þar sem gjafir sem koma börnum vel séu látnar hafa meira vægi en sú markaðshyggja sem reyna á að koma í veg fyrir.

Sjá einnig: Grunnskólabörn í Reykjavík mega ekki fá hjálma merkta Eimskipafélaginu

„Ég tel að forvarnarfræðsla um tannhirðu, öryggi barna á hjólunum sínum og skemmtileg fræðsla um sólmyrkva eigi að hafa forgang umfram það að þessum gjöfum fylgi einhverjar merkingar,“ er haft eftir henni í tilkynningunni.

Í tillögunni er það lagt í hendur skólastjóra að meta hverju sinni hvaða tilgang gjöfin hefur og þar af leiðandi hvort að leyft verði að afhenda hana skólabörnum.

Sjá einnig: Börn í Reykjavík mega ekki fá tannbursta

Mikil umræða hefur spunnist í kringum gjafir til barna en eins og greint var frá á Vísi í janúar er bæði búið að banna tannlæknum að gefa skólabörnum tannbursta og Kiwanishreyfingunni að gefa reiðhjólahjálma í samvinnu við Eimskip. Ástæða þessa er að vörurnar eru merktar fyrirtækjum.

Reglur borgarinnar banna allar gjafir á skólatíma sem merktar eru fyrirtækjum og er engar undantekningar gerðar á þessu þó að gjafirnar séu hluti af forvarnarstarfi. Þessu vilja borgarfulltrúar Sjálfstæðisflokksins breyta.

Samþykkt var á borgarstjórnarfundinum með öllum greiddum atkvæðum að senda tillöguna til skóla- og frístundarráðs til frekari umfjöllunar.




Fleiri fréttir

Sjá meira


×