Handbolti

Viggó í liði umferðarinnar

Ingvi Þór Sæmundsson skrifar
Viggó í leik með Gróttu gegn ÍR á síðasta tímabili.
Viggó í leik með Gróttu gegn ÍR á síðasta tímabili. vísir/ernir
Viggó Kristjánsson, leikmaður Randers, var valinn í lið 3. umferðar dönsku úrvalsdeildarinnar í handbolta fyrir frammistöðu sína í eins marks tapi, 26-27, fyrir Mors-Thy um síðustu helgi.

Viggó skoraði sex mörk í leiknum og var markahæstur allra á vellinum.

Þrátt fyrir að hafa tapað leiknum fyrir Mors-Thy á Randers tvo fulltrúa í liði 3. umferðarinnar sem var birt á opinberri heimasíðu dönsku deildarinnar. Hinn er hornamaðurinn Lars Skaarup sem skoraði fimm mörk gegn Mors-Thy.

Viggó gekk til liðs við Randers frá Gróttu í sumar. Hann hefur skorað 12 mörk í fyrstu þremur leikjum liðsins á tímabilinu. Sex þeirra hafa komið úr vítum.

Þrátt fyrir að Viggó hafi farið vel af stað með Randers gengur liðinu illa en það er í þrettánda og næstneðsta sæti deildarinnar án stiga.


Tengdar fréttir




Fleiri fréttir

Sjá meira


×