Verður Eiður meistari í dag?

Eiður Smári Guðjohnsen og félagar hans í Chelsea geta orðið enskir meistarar í dag með sigri á Bolton. Chelsea vantar tvö stig til viðbótar úr síðustu fjórum leikjunum til að gulltryggja titilinn. Eiður Smári gæti því orðið fjórði íslenski knattspyrnumaðurinn sem nær að verða meistari í fimm stærstu deildum Evrópu, ensku úrvalsdeildinni, þýsku bundesligunni, ítölsku a-deildinni, spænsku 1. deildinni eða frönsku 1. deildinni. Eiður Smári verður því væntanlega bæði fyrsti íslenski leikmaðurinn sem fær verðlaunapening fyrir að vera enskur meistari sem og fyrsti íslenski leikmaðurinn í 13 ára sögu ensku úrvalsdeildarinnar sem vinnur titilinn. Ásgeir Sigurvinsson varð fyrstur Íslendinga til að verða meistari í einum af fimm stærstu deildum Evrópu þegar hann varð meistari með Stuttgart í Vestur-Þýskalandi vorið 1984. Ásgeir varð annar markahæsti leikmaður liðsins með tólf mörk í 31 leik þrátt fyrir að spila á miðjunni og var í lok tímabilsins valinn knattspyrnumaður ársins af öðrum leikmönnum deildarinnar. Sigurður Jónsson varð enskur meistari með Arsenal tímabilið 1990 til 1991 en lék þó aðeins tvo leiki um mánðarmótin septermber/október vegna erfiða bakmeiðsla. Sigurður lék því ekki nægilega marga leiki til að fá verðlaunapening en lágmarkið er að hafa tekið þátt í 10 leikjum liðsins. Eyjólfur Sverrisson varð síðan þýskur meistari með Stuttgart átta árum eftir að Ásgeiri vann titilinn en þetta eru einu meistaratitlar félagsins síðustu hálfa öldina. Eyjólfur lék 31 leik með Stuttgart þennan vetur og skoraði í þeim þrjú mörk. Einhver miskilingur hefur verið í gangi um að Albert Guðmundsson hafi orðið franskur meistari með OGC Nice en svo er ekki því liðið varð meistari árið eftir að hann hafði snúið heim til Íslands.