Verðlaunaféð komið yfir tíu milljónir

„Hún hefur unnið til þó nokkurra verðlauna, ég hugsa að heildarverðlaunaféð hingað til sé yfir tíu milljónir en af því fáum við bara helminginn, því hinn helmingurinn fer til dreifingaraðila. Aðalatriðið er þó heiðurinn að fá að komast inn á hátíðir,“ segir Friðrik Þór Friðriksson, framleiðandi kvikmyndarinnar Hross í oss, en myndin hefur farið sigurför um heiminn. Myndin hefur hlotið yfir tuttugu verðlaun á kvikmyndahátíðum um heim allan, sem hefur skilað henni yfir tíu milljónum króna í verðlaunafé, en hún á þó enn eftir að fara á nokkrar hátíðir sem gætu gefið peningaverðlaun.

„Við verðum á Norrænu kvikmyndaverðlaununum og þar eru peningaverðlaun í boði en sigurvegarinn verður tilkynntur 23. október að ég held. Svo komum við til greina á kvikmyndaverðlaunum Evrópu en íslenskum myndum hefur ekki gengið vel þar því þar er helst kosið eftir þjóðerni en það er samt sem áður heiður að komast þangað,“ útskýrir Friðrik Þór.

Hann segir þó að yfirleitt séu ekki veitt peningaverðlaun á kvikmyndahátíðum en að hann hafi þó sett upp plan sem gengið hafi eftir. „Það er nokkrar stórar hátíðir sem gefa peningaverðlaun. San Sebastian-hátíðin á Spáni er ein af þeim hátíðum sem gefa góðan pening og unnum við til verðlauna þar. Það voru um 70.000 evrur sem myndin fékk en sá peningur skiptist svo á milli dreifingaraðila á Spáni og leikstjóra.“

Myndin hefur fengið góða dóma í löndum á borð við Frakkland, Danmörku, Mexíkó, Noreg og Spán en myndin hefur verið sýnd í kvikmyndahúsum í þessum löndum. „Hún er svo að fara í sýningu í Þýskalandi, Bandaríkjunum og Austurríki á næstunni.“

Friðrik Þór segist þó hafa búist við þessari velgengni um leið og hann sá myndina í fyrsta sinn og sama má segja um leikstjóra myndarinnar, Benedikt Erlingsson. „Ég bjóst við að ef þetta tækist gæti allt gerst, en þetta hefur verið mikið ævintýri og ég er mjög þakklátur. Ég er bara byrjandi og þekki ekki annað, ætli það fari ekki allt niður á við núna,“ segir Benedikt og hlær. „Benni er unglingur og rétt búinn að missa bleyjuna, hans ævintýri er langstærsta ævintýri íslensks kvikmyndaleikstjóra, engin fyrsta mynd hefur notið svona rosalegrar velgengni,“ bætir Friðrik Þór við.

Hross í oss er enn í sýningu í Bíói Paradís. gunnarleo@frettabladid.is

Kutxa-New Directors Award, San Sebastian Film festival 2013.

Best Direktor, Tokyo Film Festival 2013

Prix de la Ville d’Amiens. Amiens Film festival 2013

Prix d’interprétation feminine (besta leikkonan) Amiens Film festival 2013

The Grand Jury Prize Les Arcs festival 2013

The Prize for the Best Music Les Arces Festival 2013

The Youth prize, Tarragona Film festival 2013

Tridens Competition; Best Film of Feature Debuts, Tallinn Film festival 2013

The International film critics FIPRESCI AWARD, Tallinn Film festival 2013

Best cinemaphotagrafer, Tallinn Film festival 2013

The Audians Prize, Tromsø Film festival 2014

The Dragon award Best Nordic Film, Audience choice. Göteborg filmfest 2014

The International film critics FIPRESCI AWARD, at the festival of Göteborg 2014

Politikens Puplikums CPH PIX 2014

Grand prix Aubagne International filmfest 2014

Grand Prix de la Meilleure Musique Originale 2014 (Aubagne)

Golden Iris Award: Brussel filmfestival 2014.

6 Eddur:

Besta mynd

Besta handrit

Besti leikstjóri

Besta kvikmyndataka

Besti karlleikar í aðalhlutverki

Bestu brellur

Friðrik Þór og Benedikt furða sig báðir á sinnuleysi stjórnvalda í garð kvikmyndagerðar. „Kvikmyndasjóður er tómur núna, menn fá ekki einu sinni handritsstyrk. Það er skandall að menn fái ekki byr undir báða vængi þegar þeir hafa sannað sig eins og Benni. Hagkerfið snýst um túrisma en túrisminn er til sökum innlendrar og erlendrar kvikmyndagerðar hér á landi,“ segir Friðik Þór.

„Ef kvikmyndagerðarmaður fær eina krónu í styrk frá ríki til að búa til íslenska bíómynd þarf hann að sníkja aðrar tvær, td. frá útlöndum, til að geta gert myndina. Öllum krónunum þremur eyðir hann í launagreiðslur á íslenska efnahagssvæðinu. Og öll vitum við hvað það þýðir fyrir ríkisjóð. Út úr þessu verður til hugverk sem selur skattlagða bíómiða og að lokum ef vel tekst til selur hann myndina til útlanda og fær útlenskar krónur sem koma heim í vasa kvikmyndgerðarmannsins eftir herraklippingu hjá ríkinu. Nokkurn veginn á þessum grunni hvílir kenning Kanadamanna um að fyrir hverja eina krónu sem ríkið styrkir kvikmyndagerð fær það 4 til baka. Við þetta má svo bæta seldum flugferðum og gistinóttum sem aukaafurð af íslenskri kvikmyndagerð. Hross í oss er ein af mörgum íslenskum kvikmyndum sem hafa dregið túrista til landsins í massavís,“ segir Benedikt.