Viðskipti innlent

Verðbréfasjóðir vilja sitja við sama borð og lífeyrissjóðirnir

Sæunn Gísladóttir skrifar
Lífeyrissjóðir hafa heimild til fjárfestinga erlendis en ekki verðbréfasjóðir.
Lífeyrissjóðir hafa heimild til fjárfestinga erlendis en ekki verðbréfasjóðir. NordicPhotos/getty
Verðbréfa- og fjárfestingarsjóðir hérlendis vilja hafa sömu heimild til fjárfestinga erlendis og í sömu hlutföllum og lífeyrissjóðir og vörsluaðilar séreignarlífeyrissparnaðar hafa fengið hérlendis á síðustu mánuðum. Óljóst er hvenær þeir muni fá leyfi til þess.

Morgunblaðið greindi frá því í gær að fjármálafyrirtækið Gamma hefði sent Seðlabanka Íslands bréf þar sem þess er krafist að verðbréfa- og fjárfestingarsjóðir sitji við sama borð og lífeyrissjóðir þegar kemur að fjárfestingum erlendis. Í bréfinu kemur fram að fyrirtækið áskilji sér rétt til að höfða mál gegn bankanum og leggja inn kvörtun til ESA, eftirlitsstofnunar EFTA, vegna þessa.





Bragi Gunnarsson. Mynd/Landsbréf
Starfsmenn fjárfestingarfyrirtækja sem Fréttablaðið ræddi við eru sama sinnis og forsvarsmenn Gamma. „Við höfum verið á þessari skoðun í lengri tíma, að við teljum að sé full þörf á því, við höfum þó ekki sent erindi þess efnis til hvorki Seðlabankans né annarra. Hingað til höfum við bara beðið eftir heimildinni, en okkur finnst eðlilegt að þessar undanþágur sem hafa verið veittar ættu einnig að vera veittar rekstrarfélögum sem reki fjárfestingarsjóði,“ segir Hannes Frímann Hrólfsson, hjá Virðingu.

Bragi Gunnarsson, lögfræðingur hjá Landsbréfum, tekur undir þetta. „Við erum sammála Gömmu. Ég held að þeir séu að koma þarna á framfæri sjónarmiðum sem er alveg samhljómur fyrir hjá öðrum. Það liggur í hlutarins eðli að það eru hagsmunir rekstrarfélaganna og þeirra sem fjárfesta í þeim að sitja við sama borð. Ég held að það sé jákvætt fyrir alla aðila.“ Bragi segir þó að engin afstaða hafi verið tekin til þess að kvarta og að málið hafi ekki verið rætt sérstaklega innan Landsbréfa. 

Fréttin birtist fyrst í Fréttablaðinu






Fleiri fréttir

Sjá meira


×