Golf

Valdís Þóra hækkaði sig um ellefu sæti og er fjórða fyrir lokadaginn

Óskar Ófeigur Jónsson skrifar
Valdís Þóra Jónsdóttir.
Valdís Þóra Jónsdóttir. Mynd/LET/Tristan Jones
Valdís Þóra Jónsdóttir lék frábært golf á fjórða keppnisdeginum af fimm á lokaúrtökumótinu fyrir sterkustu mótaröð Evrópu, LET Evrópumótaröðina.

Valdís lék á 65 höggum í dag á fjórða hringnum og hún er fjórða sæti fyrir lokahringinn á -11. Þetta er besti árangur hennar á lokaúrtökumótinu frá upphafi en þetta er i fjórða sinn sem hún tekur þátt.

Valdís Þóra bætti skorið sitt þriðja daginn í röð og hækkaði sig jafnframt um ellefu sæti á listanum. Hún lék á 72 höggum fyrsta daginn, þá 71 höggi, 69 höggum í gær og loks á 65 höggum í dag.

Engin lék betur en Valdís en hin enska Lauren Taylor lék einnig á 65 höggum í dag. Hún er hinsvegar í 19. sætinu, sex höggum á eftir Valdísi.

Nú eru það aðeins hin franska Celine Boutier, hin sænska Madalene Sagström og hin ástralska Celina Yuan sem hafa spilað bestur en Skagastelpan á þessu móti.

Valdís Þóra er ein af þremur sem hafa leikið fyrstu 72 holurnar á ellefu höggum undir pari.

Celine Boutier er á toppnum á sautján höggum undir pari en hinar tvær hafa leikið á þrettán höggum undir pari.

Það er mikið í húfi því 30 efstu fá keppnisrétt á LET Evrópumótaröðinni og þeir sem enda í sætum 31.-60. fá takmarkaðan keppnisrétt á næsta tímabili sem hefst í janúar. Eftir fjórða hringinn fá 60 efstu tækifæri til þess að leika á lokahringnum.

Sú sem er í 30. sæti núna er á þremur höggum undir pari eða átta höggum á eftir Valdísi. Valdís er því í frábærum málum fyrir lokahringinn á morgun.


Tengdar fréttir

Valdís svaf illa vegna láta í næturklúbbi

Þó að Valdís Þóra Jónsdóttir hafi fengið frekar lítinn svefn fyrir annan hringinn á lokaúrtökumótinu fyrir Evrópumótaröðina í Marokkó þá spilaði hún mjög vel í gær.

Valdís Þóra náði þremur fuglum í röð

Valdís Þóra Jónsdóttir, atvinnukylfingur úr Leyni á Akranesi, er að standa sig mjög vel á fyrri hringnum á fjórða keppnisdeginum af fimm á lokaúrtökumótinu fyrir sterkustu mótaröð Evrópu, LET Evrópumótaröðina.




Fleiri fréttir

Sjá meira


×