Útrásin

Nú þegar þjóðinni er ógnað með þjóðargjaldþroti er brýnt að horfa um öxl og reyna að svara spurningunni: Hvað fór úrskeiðis? Við byrjum að leita svara og vekja upp nýjar spurningar. Var útrásin sjónarspil fámenns hóps - spilaborg sem hefði hrunið, jafnvel þó erlent fárviðri í fjármálaheiminum hefði ekki dunið yfir?

Svo virðist sem útrásin hafi að mestu verið blekking. Flutningur á stórfelldum verðmætum frá Íslandi yfir á erlendar kennitölur. Íslenskar eignir hafa verið færðar til Lúxemborg og Hollands eða á smáeyjar á Karíbahafi sem eru alræmt skattaskjól og leikvellir skuggalegra peningaafla.

Tímaskeið nýja hagkerfisins á Íslandi leið undir lok á dögunum. Það reyndist býsna innistæðulítið. Lítill hópur manna leiddi þennan Hrunadans og stjórnálamenn stigu með þeim sporin. Almenningur var slegin blindu en þarf nú að horfast í augu við hættuna á þjóðargjaldþroti. Afneitun er ekki valkostur.