Innlent

Útlendingastofnun: Gæði heilbrigðiskerfisins í Albaníu minni en í öðrum Evrópuríkjum

Atli Ísleifsson skrifar
Alls voru 27 einstaklingar fluttir af landi brott á fimmtudagsmorgun í samstarfi ríkislögreglustjóra og Frontex Landamærastofnun Evrópu.
Alls voru 27 einstaklingar fluttir af landi brott á fimmtudagsmorgun í samstarfi ríkislögreglustjóra og Frontex Landamærastofnun Evrópu. Vísir/GVA
Útlendingastofnun telur að gæði heilbrigðisþjónustunnar í Albaníu séu minni, borin saman við heilbrigðisþjónustur í öðrum þróuðum löndum innan Evrópu. Heilbrigðisþjónustan hafi þó tekið miklum framförum á undangengnum árum auk þess sem sérhæfing er að aukast og sé albönskum borgurum tryggður aðgangur að heilbrigðiskerfinu og nauðsynlegum lyfjum þar í landi.

Stofnunin hefur tekið saman gögn um heilbrigðiskerfið í Albaníu í kjölfar fjölmiðlaumfjöllunar um aðstæður í Albaníu eftir að albönskum hælisleitendum var vísað úr landi fyrr í vikunni.

Alls voru 27 einstaklingar fluttir af landi brott á fimmtudagsmorgun í samstarfi ríkislögreglustjóra og Frontex Landamærastofnun Evrópu. Þar af hafi verið fimm fjölskyldur; þrjár frá Makedóníu og tvær frá Albaníu.

Fall kommúnismans hafði áhrif

Í samantekt Útlendingastofnunar kemur fram að fall kommúnistans hafi haft mikil áhrif á heilbrigðiskerfið í Albaníu og hafi framfarir í átt til betri vegar tekið langan tíma. „Heilbrigðisþjónustan í landinu er að mestu í höndum hins opinbera og eru allir íbúar landsins skyldugir til að hafa sjúkratryggingu en foreldrar albanskra barna eru ekki krafðir um greiðslu vegna heilbrigðisþjónustu fyrir börn sín. Slík sjúkratrygging veitir aðgang að allri grundvallar heilbrigðisþjónustu ásamt því að lyf eru greidd niður af ríkinu.

Gæði heilbrigðisþjónustunnar eru minni sé hún borin saman við heilbrigðisþjónustur í öðrum þróuðum löndum innan Evrópu en þó hefur hún tekið miklum framförum á undangengnum árum auk þess sem sérhæfing er að aukast. Í landinu eru yfir fjörutíu almenningssjúkrahús og fjögur háskólasjúkrahús.“

42 sjúkrahúsapótek

Stofnunin segir að lyfjasala og framleiðsla á lyfjum í Albaníu fari að mestu fram fyrir tilstilli einkaaðila og séu 42 sjúkrahúsapótek eru rekin í landinu. Sjúkrahúsapótekin veiti opinbera þjónustu en þjónustan í heild sinni, hjá hinu opinbera sem og hjá einkaaðilum, stefni að góðu almennu aðgengi borgara að öruggum lyfjum sem standast ríkustu kröfur án þess að verð sé óeðlilega hátt.

„Þrátt fyrir að þjónustan fari að mestu leyti fram fyrir tilstilli einkaaðila viðhefur heilbrigðis- og lyfjaráðuneyti Albaníu strangt eftirlit með þjónustunni. Eins og að framan greinir eru allir borgarar Albaníu skyldugir til að hafa sjúkratryggingu en slík trygging greiðir t.a.m. 50-100% af verði lyfja þess tryggða. Auk þess hafa borgarar landsins möguleika á að kaupa viðbótartryggingu sem t.d. greiðir hluta sjúklings af lyfjakostnaði auk þess að greiddar eru nauðsynlegar ferðir þess tryggða til annarra landa sé honum það nauðsynlegt vegna sjúkdóms síns.

Líkt og að framan greinir er öllum albönskum borgurum tryggður aðgangur að heilbrigðiskerfinu og nauðsynlegum lyfjum þar í landi. Undanfarin tvö ár hefur albanska ríkið í samvinnu við alþjóðlega endurreisnar- og þróunarbankann (e. World Bank) unnið að endurskipulagningu heilbrigðiskerfisins í Albaníu og hefur alþjóðlegi endurreisnar- og þróunarbankinn lagt til 32,1 milljón evra til verkefnisins til móts við þær 4 milljónir evra sem albanska ríkið leggur til. Ætlunin með hinu aukna fjármagni er að draga úr greiðslum af hendi albanskra borgara fyrir heilbrigðisþjónustu og mun hin skyldubundna sjúkratrygging greiða í það minnsta 65% af hlut sjúklings að lokinni endurskipulagningu auk þess sem lyfjakostnaður mun í heild sinni lækka.“

Að lokum vísar Útlendingastofnun í að í Albaníu séu starftækt góðgerðasamtök sem sérhæfi sig í aðstoð til handa albönskum börnum sem vegna einhverra ástæðna geta ekki sótt aðstoð til yfirvalda vegna veikinda sinna. „Í yfirlýstum markmiðum sínum segir m.a. að stofnunin aðstoði fjölskyldur veikra barna í Albaníu fjárhagslega til að nálgast nauðsynleg lyf og greiði jafnvel nauðsynlegan ferðakostnað fjölskyldumeðlima til útlanda svo viðkomandi barn geti átt kost á viðunandi heilbrigðisaðstoð utan Albaníu.“


Tengdar fréttir

Aðstæður í Albaníu óboðlegar börnum

Brottvísun tveggja albanskra fjölskyldna hefur vakið mikla reiði í samfélaginu síðastliðinn sólarhring. Sérstaklega vegna veikinda tveggja ungra drengja. Í annað sinn á hálfu ári er flugvél leigð undir hóp albanskra hælisleitenda til að senda þá úr landi.




Fleiri fréttir

Sjá meira


×