Fótbolti

Úr bílaverskmiðju til Arsenal

Eiríkur Stefán Ásgeirsson skrifar
Cohen Bramall með Arsene Wenger við undirritun samningsins.
Cohen Bramall með Arsene Wenger við undirritun samningsins. Vísir/Getty
Hinn tvítugi Cohen Bramall er genginn til liðs við enska stórliðið Arsenal en saga hans er ólíkari flestum öðrum leikmönnum ensku úrvalsdeildarinnar.

Bramall æfði með Arsneal í síðustu viku og gerði nóg til að fá samning. Hann mun nú æfa og spila með U-23 liði félagsins.

Hann er vinstri bakvörður og spilaði síðast með Hednesford í utandeildinni. Hann þurfti að vinna með fótboltanum og starfaði í bílaverksmiðju fyrir Bentley, þar sem honum var reyndar sagt upp vegna niðurskurðar í síðasta mánuði.

„Þegar mér var sagt upp þá vissi ég ekki hvað ég átti að fara að gera,“ sagði hann í samtali við BBC.

„Umboðsmaðurinn minn, Lee Payne, hringir í mig næsta dag og segir að ég megi æfa til reynslu hjá Arsenal. Ég var steinhissa,“ sagði hann enn fremur.

Hann var fljótur að pakka í ferðatösku og koma sér á réttan stað. Skyndilega var hann mættur á æfingu með aðalliði Arsenal.

„Það er algjör bilun hversu hratt þetta gekk allt fyrir sig. Ég hitti alla og þeir tóku mér strax. Ég varð að grípa þetta tækifæri báðum höndum.“

Önnur lið, Crystal Palace og Sheffield Wednesday, höfðu verið að fylgjast með Bramall en Arsenal var eina liðið sem komst að samkomulagi við hans gamla félag um félagskipti. Arsenal greiddi Hednesford 5,6 milljónir króna fyrir kappann.

„Bramall er ungur og afar efnilegur vinstri bakvörður sem skortir að vísu reynslu en hefur margt til brunns að bera,“ sagði Arsene Wenger, stjóri Arsenal. „Hann er afar hraður, góðan vinstri fót og mikinn vilja til að standa sig vel. Hann er spennandi leikmaður.“




Fleiri fréttir

Sjá meira


×