Innlent

Undirliggjandi sjúkdómar draga ekki úr líkum á veitingu hælis eða dvalarleyfis

Sunna Karen Sigurþórsdóttir og Sunna Kristín Hilmarsdóttir skrifa
Þjónustuaðilarnir Reykjanesbær, Reykjavík og Útlendingastofnun sjá um að panta tíma í læknisskoðun fyrir hælisleitendur.
Þjónustuaðilarnir Reykjanesbær, Reykjavík og Útlendingastofnun sjá um að panta tíma í læknisskoðun fyrir hælisleitendur. VÍSIR/STEFÁN
Þjónustuaðili hælisleitanda hér á landi sér um að panta læknisskoðun fyrir hann eftir að hann er kominn í þjónustu til viðkomandi aðila. Þjónustuaðilarnir eru Reykjanesbær, Reykjavík og Útlendingastofnun en heilsugæslan gefur hælisleitandanum tíma í almenna heilsufarsskoðun og þjónustuaðili lætur hann vita um þann tíma.

 

Þá fær Útlendingastofnun ekki upplýsingar um undirliggjandi sjúkdóma hælisleitanda nema viðkomandi veiti heimild til þess eða leggi þær fram sjálfur. Undirliggjandi sjúkdómar draga ekki úr líkum á veitingu hælis eða dvalarleyfis hér á landi en geta þó haft áhrif á að umbeðið leyfi sé veitt ef ekki er til lækning eða meðferð í heimalandi hælisleitandans.

Þetta kemur fram í svari Kristínar Völundardóttur, forstjóra Útlendingastofnunar, við fyrirspurn fréttastofu um verkferla sem viðhafðir eru þegar kemur að læknisskoðunum hælisleitenda. Frá því hefur verið greint í fjölmiðlum að nígeríski hælisleitandinn, sem grunaður er um að hafa smitað ungar konur af HIV, hafi ekki verið búinn að skila inn læknisvottorði þegar málið kom upp.

 

Allir sem sækja um dvalarleyfi hér þurfa að skila inn vottorði en ekki eru nákvæmar dagsetningar á því hvenær menn eigi að mæta í læknisskoðun. Heilbrigðisyfirvöld hafa ekki tök á því að færa fólk í læknisskoðun þegar í stað en í almennu heilsufarsskoðuninni fær hælisleitandi að vita hvenær hann á að mæta í blóðrannsókn og berklapróf sem gerist síðar:

„Eftir berklapróf þarf að mæta eftir þrjá daga í álestur á prófið og eru niðurstöður sendar til læknis. Mismunandi er hvort læknisvottorð er afhent þjónustuaðila, í Reykjanesbæ er það gert en ekki í Reykjavík,“ segir í svari forstjóra Útlendingastofnunar.


Tengdar fréttir

Gæsluvarðhaldsúrskurður kærður til Hæstaréttar

Guðmundína Ragnarsdóttir, lögmaður mannsins sem grunaður er um að hafa smitað konur vísvitandi af HIV með því að hafa haft við þær óvarin mök, ætlar að kæra gæsluvarðhaldsúrskurð yfir honum til Hæstaréttar.

Á annan tug kvenna mögulega smitaðar

Karlmaður var úrskurðaður í gæsluvarðhald í gær grunaður um að hafa haft óvarin kynmök við íslenskar konur vitandi það að hann væri smitaður af HIV-veirunni. Að minnsta kosti ein kona er smituð. Sóttvarnarlæknir rekur smitleiðir.




Fleiri fréttir

Sjá meira


×