Handbolti

Umfjöllun og viðtöl: Akureyri - FH 24-24 | Stigunum bróðurlega skipt fyrir norðan

Arnar Geir Halldórsson í KA-heimilinu skrifar
Sverre Andreas Jakobsson og lærisveinar hans fengu loks aftur stig.
Sverre Andreas Jakobsson og lærisveinar hans fengu loks aftur stig. vísir/pjetur
Akureyri og FH skildu jöfn, 24-24, í níundu umferð Olís-deildar karla í KA-heimilinu í kvöld eftir æsispennandi lokamínútur. Fyrir leikinn höfðu Akureyringar aðeins unnið einn leik á meðan FH mættu til leiks fullir sjálfstrausts eftir tvo sigurleiki í röð.

Akureyri byrjaði leikinn af miklum krafti og ljóst að heimamenn ætluðu að selja sig dýrt. FH vaknaði hinsvegar af værum blundi um miðbik fyrri hálfleiks og tók fljótt yfirhöndina í leiknum.

Heimamenn urðu fyrir áfalli í fyrri hálfleik þegar Brynjar Hólm Grétarsson þurfti að yfirgefa völlinn vegna meiðsla og sömuleiðis spilaði Kristján Orri Jóhannsson aðeins fyrstu mínúturnar, einnig vegna meiðsla.

Þrátt fyrir þessi skakkaföll voru Akureyringar aldrei langt frá FH-ingum. Tíu mínútum fyrir leikslok jafna Akureyringar og var jafnt á öllum tölum til leiksloka. Akureyri fékk síðasta skot leiksins og fékk Karolis Stropus þar með tækifæri til að tryggja sigurinn en skot hans fór langt yfir markið í þann mund sem lokaflautið gall.

Það mæddi mikið á hægri væng FH-inga í sóknarleiknum en þeir Einar Rafn Eiðsson og Óðinn Þór Ríkharðsson skoruðu samtals fjórtán mörk.

Markaskorun Akureyringa dreifðist jafnar en það verður á minnast á frábæra frammistöðu Sigþórs Árna Heimissonar í síðari hálfleik. Þessi lágvaxni leikstjórnandi átti stóran þátt í að Akureyringar náðu að koma til baka.

Sverre: Hefði viljað fá boltann á markið

Sverre Jakobsson, þjálfari Akureyrar, var nokkuð sáttur með stigið enda liðið ekki búið að ná í mörg stig í vetur. Það voru þó blendnar tilfinningar sem bærðust innra með honum enda fékk Akureyri fínt tækifæri til að gera út um leikinn.

„Blendnar tilfinningar. Við börðumst alveg svakalega í þessum leik. Við verðum fyrir áfalli í fyrri hálfleik þegar við missum tvo menn út. Við börðum okkur saman og komum okkur aftur inn í leikinn. Við eigum séns í lokin og ég hefði viljað fá boltann á markið. Láta hann frekar verja en að setja boltann yfir markið."

„Þetta er mjög flott stig. Það er mjög mikilvægt fyrir pásuna að fá smá jákvæðni og mér fannst þetta góð frammistaða liðsheildarinnar," sagði Sverre

Margir leikir Akureyringa hafa verið mjög jafnir og oftar en ekki ráðist á síðustu sekúndunum. Liðinu hefur hinsvegar aðeins tekist að ná í einn sigur. Hvers vegna gengur svona illa að landa sigri?

„Það er sitt lítið af hverju. Við erum að vinna í þeim hlutum. Það vantar stundum smá skynsemi og stundum smá heppni. Við erum búnir að tapa mörgum leikjum þegar það hefur verið jafnt tveim mínútum fyrir leikslok. Það er erfitt að greina þetta," sagði Sverre.

Akureyringar ætla að nýta landsleikjahléið vel og vonast Sverre til að endurheimta einhverja leikmenn úr meiðslum en margir lykilmenn hafa verið í vandræðum með meiðsli í vetur.

„Við nýtum fríið vel og rétt. Við erum búnir að setja upp okkar leið í því og við munum koma flottir til baka. Vonandi koma einhverjir leikmenn til baka úr meiðslum."

Þær sögusagnir hafa verið á sveimi að Sigþór Árni Heimisson þurfi að taka sér frí frá handboltaiðkun vegna þrálátra meiðsla. Það var þó ekki að sjá á hans leik í kvöld en Sigþór átti afar góðan leik. Sverre vonast til að hann verði með liðinu í fyrsta leik eftir hlé.

„Hann hefur átt erfitt uppdráttar  í vetur útaf meiðslunum sínum. Hann er í vandræðum með hásinarnar. Hann þarf að ná sér góðum af því og við sjáum hvort pásan gerir honum ekki gott. Hann þarf að taka góða pásu og hvort þessar tvær vikur séu nóg veit ég ekki. Það verður bara að koma í ljós," sagði Sverre.

Halldór Jóhann: Þeir fengu að spila eina mínútu og tíu sekúndur í síðustu sókninni

Halldór Jóhann Sigfússon, þjálfari FH, var að vonum svekktur enda leiddi liðið leikinn langstærstan hluta.

„Það er svekkjandi að tapa þessu eina stigi. Við gáfum eftir á kafla í síðari hálfleik og urðum stressaðir í sóknarleiknum. Við töpuðum boltanum oft aulalega. Baráttan var samt til staðar og menn voru að leggja sig fram. Ég get ekki annað en hrósað mönnum fyrir það."

Halldór var ekki ánægður með hvað Akureyringar fengu langan tíma í lokasókn leiksins og átti í hrókasamræðum við dómarana í leikslok.

„Ég var ósáttur við að þeir fengu að spila mínútu og tíu sekúndur í síðustu sókninni. Mér finnst það vera alltof langt. Þeir voru með hendina uppi í tæpar 30 sekúndur. Það átti að vera löngu búið að flauta af þeim boltann. Dómararnir vilja skýla sér á bakvið þessar nýju reglur en ég er ekki sáttur við það. Leikurinn var annars bara dæmdur á báða bóga en ég er bara ósáttur við þetta atriði í lokin af því að það var ferskt í huganum," segir Halldór.

Nú tekur við tveggja vikna hlé í deildinni vegna landsleikja en Ísland mætir Tékkum og Úkraínu í undankeppni EM í næstu viku.

„Við ætlum að nýta það vel og æfa vel. Fyrst fá leikmenn nokkra daga í frí og fá aðeins að kasta mæðinni. Við erum búnir að spila á mjög fáum leikmönnum og höfum verið í meiðslavandræðum. Svo byrjum við bara á mánudag að undirbúa okkur fyrir törnina fram að jólum.

FH-ingar sitja í öðru sæti deildarinnar þegar þriðjungur mótsins er búinn. Halldór. kveðst vera ánægður með lið sitt hingað til.

„Við vitum að við getum bætt heilmargt í okkar leik en vitum líka að það er margt gott. Ég er heilt yfir búinn að vera mjög ánægður þó ég myndi vilja vera með tveim til þrem stigum meira. Miðað þau skakkaföll sem við erum búnir að ganga í gegnum getum við verið nokkuð sáttir með þessi tíu stig. Við hugsum fram á veginn og ætlum að halda áfram að bæta leik liðsins jafnt og þétt," sagði Halldór Jóhann.






Fleiri fréttir

Sjá meira


×