Innlent

Umfjöllun BBC um ferðamenn á Íslandi: "Væri enn betra ef það væri færra fólk hérna“

Tryggvi Páll Tryggvason skrifar
Reynisfjara á Suðurlandi.
Reynisfjara á Suðurlandi. Vísir/Friðrik Þór Halldórsson
Ítarleg umfjöllun er á vef BBC um ástæður þess að Ísland sé orðinn einn af vinsælustu áfangastöðum ferðamanna í heiminum. Mikil umfjöllun um Ísland á undanförnum árum, lág flugfargjöld og fegurð landsins eru sagðar helstu ástæðurnar. En vandamálin eru ekki langt undan.

Fjallað er um þá gríðarlega fjölgun sem orðið hefur á komu ferðamanna hingað til lands á undanförnum árum. Tekið er sérstaklega fram að hér á landi búi aðeins 330 þúsund manns sem hafi tekið á móti tæplega tveimur milljónum ferðamanna á síðasta ári.

Ísland er sagt vera sneiðmynd af alþjóðlegri þróun þar sem ferðaþjónusta er að verða einn stærsti atvinnuvegur heimsins og þau áhrif sem ódýr flugfargjöld geta haft á efnahag ríkja.

Ísland mikið í fréttunum

Tekið er fram að ein af ástæðunum þess að Ísland komst á kortið sé sú að mikið hefur verið fjallað um Ísland í erlendum fjölmiðlum undanfarin ár. Ísland varð alræmt eftir bankahrunið 2008 auk þess sem að eldgosið í Eyjafjallajökli árið 2010 og árangur Íslands á EM í knattspyrnu síðastliðið sumar hafi gert það að verkum að Ísland hefur reglulega verið á allra vörum undanfarin ár.

Algeng sjón á Keflavíkurflugvelli undanfarin ár.vísir/gva
Ódýr flugfargjöld líklega haft mest áhrif

Fjölmörg flugfélög flúga til og frá Íslandi og í umfjöllun BBC er rætt við David Godger, sérfræðing hjá Oxford Economics. Hann segir að mörg flugfélög hafi gert sérstaklega vel í því að bjóða farþegum sínum að stoppa í nokkra daga á Íslandi áður en þeir halda för sinni áfram.

„Við sjáum að ferðamennirnir eru oftar en ekki að gera hlé á ferði sinni á Íslandi og stoppa þar í nokkra daga,“ segir Godger. „Þetta er nákvæmlega það sem Dubai og Singapúr gerðu fyrir nokkrum árum.“

Einnig er rætt við Ingu Hlín Pálsdóttur hjá Íslandsstofu sem segir að þetta hafi greinilega haft sín áhrif á mannlífið á Íslandi. Bendir hún blaðamanni á svæðið hjá Reykjavik Marina Hotel og segir að eftir hrunið hafi ekkert verið að gerast á þessu svæði en nú sé það iðandi af lífi.

Blaðamaður fjallar einnig um að víða um borgina má sjá byggingarkrana á lofti og þá tekur hann sérstaklega eftir því að á Keflavíkurflugvelli mátti sjá auglýsingu frá Bláa lóninu þar sem fyrirhuguð stækkun er auglýst.

Kínversku ferðamennirnir voru látnir raka ofan í för eftir utanvegakstur á sínum tíma.Mynd/Kristinn Jón
Ekki allir ánægðir

Einnig er fjallað um skuggahliðar ferðamennskunnar og er rætt við Salome Hallfreðsdóttir hjá Landvernd sem segist hafa áhyggjur áhrifum ferðamanna á óspillt landsvæði hér á landi. Hún segist hafa orðið fyrir áfalli síðast þegar hún kom að Landmannalaugum síðasta sumar.

Þar sá hún hundruð bíla og fleiri ferðamenn en hún hafi nokkru sinni séð áður. Þá nefnir Salome að Íslendingar hafi miklar áhyggjur af utanvegaakstri og að nauðsynlegt sé að fjölga landvörðum til þess að tryggja að ferðamenn fari eftir reglum á hálendinu.

Blaðamaður veltir því fyrir sér hvort að vöxtur ferðaþjónustunnar hér á landi muni halda áfram og hvort vöxturinn sé sjálfbær. Nefnir hann að hlutur ferðaþjónustunnar af landsframleiðslu sé stærri hér en víðast hvar í Evrópu og spyr hvort að blaðran geti sprungið.

Nefnir hann sem dæmi að fall breska pundsins og dollarans gagnvart krónunni hafi gert það að verkum að skyndilega séu ferðirnar til Íslands orðnar dýrari fyrir Breta og Bandaríkjamenn.

„Okkar líkan sýnir að það eru skýr tengsl á milli gengis og árangurs í ferðaþjónustu,“ segir Goodger. Hann gerir ráð fyrir að það hægist á vexti ferðaþjónustunnar en vöxturinn haldi engu að síður áfram. Það geri þó breyst.

„Ef Ísland verður mun dýrari áfangastaður en nú gæti þetta snúist við,“ segir Goodger.

Að lokum fer blaðamaður í heimsókn til Bláa lónsins og heyrir einn ferðalanginn segja við vin sinn: „Væri enn betra ef það væri færra fólk hérna“

Lesa má ítarlega umfjöllun BBC hér.


Tengdar fréttir




Fleiri fréttir

Sjá meira


×