Handbolti

Umfjöllun, viðtöl og myndir: Stjarnan - Grótta 29-23 | Stjarnan leiðir 1-0

Kristinn Páll Teitsson í Mýrinni skrifar
Úr leik liðanna í kvöld.
Úr leik liðanna í kvöld. vísir/stefán
Stjarnan vann öruggan sigur á Gróttu í fyrsta leik liðanna í undanúrslitum Olís-deildar kvenna í handbolta í kvöld. Góður kafli Stjörnukvenna á upphafsmínútum seinni hálfleiks gerði út um leikinn

Bæði lið unnu einvígi sín í átta liða úrslitum 2-0, Grótta sló út ríkjandi Íslandsmeistara Fram nokkuð óvænt en Stjarnan vann HK. Liðin unnu sinn sigurinn hvort þegar þau mættust í deildarkeppninni en báðum leikjum lauk með heimasigri.

Sóknarleikur Gróttu var lengi af stað og komst Stjarnan í 3-0 eftir sex mínútna leik. Það virtist vekja gestina sem jöfnuðu um miðbik hálfleiksins með marki Guðnýjar Hjaltadóttir úr horninu í stöðunni 6-6.

Stjörnukonur settu þá í gír og náðu aftur þriggja marka forskoti en jafn óðum jöfnuðu Gróttukonur þegar tvær mínútur voru til hálfleiks. Leikmenn Stjörnunnar áttu enn eina rispuna rétt fyrir lok hálfleiksins og náðu þriggja marka forskoti um leið og hálfleiksflautan gall þegar Hildur Harðardóttir fylgdi eftir eigin stangarskoti.

Í seinni hálfleik voru úrslitin ráðin eftir tíu mínútna leik. Stjörnukonur settu einfaldlega í lás og náðu tíu marka forskoti þegar tíu mínútu voru liðnar í stöðunni 22-12. Gróttukonur náðu að minnka muninn í fimm mörk þegar tíu mínútur voru til leiksloka en lengra komust þær ekki og lauk leiknum með sigri Stjörnunnar.

Jóna Margrét Ragnarsdóttir var atkvæðamest í liði Stjörnunnar með 10 mörk en í markinu varði Florentina Stanciu 14 skot. Í liði Gróttu var það Unnur Ómarsdóttir sem fór fyrir liði sínu með sex mörk, þar af fjögur af vítalínunni. Í markinu hjá Gróttu stóð Íris Björk Símonardóttir vakt sína með prýði og varði átján skot, þar af tvö af vítalínunni.



Jóna: Sýndum breiddina í kvöld„Þessi leikur vannst örugglega en þetta var bara einn leikur,“ sagði Jóna Margrét Ragnarsdóttir, leikmaður Stjörnunnar eftir leikinn.

„Við spiluðum mjög góða vörn í seinni hálfleik og náðum að hlaupa línurnar okkar. Þar fyrir aftan stóðu markmennirnir sig vel fyrir aftan okkur og þegar skotin fóru að detta var þetta ekki spurning.“

Fyrri hálfleikur var kaflaskiptur og skiptust liðin á því að eiga góða rispur út hálfleikinn. Í seinni hálfleik var allt annað að sjá til Stjörnuliðsins sem gerði út um leikinn á upphafsmínútunum.

„Það var frábært að ná forskotinu rétt fyrir lok hálfleiksins en við komum svo brjálaðar inn í seinni hálfleikinn og náðum góðu forskoti. Við reyndum aðeins að hægja á leiknum í lokin en þær náðu að minnka muninn svo við þurftum að fara að hlaupa aftur.“

Stjörnuliðið hefur orðið fyrir töluverðum áföllum en Jóna var nokkuð brött í viðtölum eftir leik.

„Þrátt fyrir að vera búnar að missa marga leikmenn stefnum við að sjálfsögðu í úrslitin og við sýndum í kvöld breiddina í liðinu. Við verðum að spila á því sem við höfum og berjast saman áfram. Við erum allar búnar að æfa jafn mikið í vetur og það verður bara næsti maður að stíga upp,“ sagði Jóna að lokum.

Íris Björk: Misstum kúlið í seinni hálfleik„Þetta var hörkuleikur í fyrri hálfleik en þær einfaldlega völtuðu yfir okkur fyrstu tíu mínúturnar í seinni hálfleik,“ sagði Íris Björk Símonardóttir, markmaður Gróttu svekkt eftir leikinn.

„Við vorum að missa boltann klaufalega í sókninni og þær náðu að nýta sér það. Við misstum kúlið í seinni hálfleik og spiluðum eins og við værum fimmtán mörkum undir í stað þess að spila okkar leik.“

Fyrri hálfleikur var kaflaskiptur en gestirnir af Seltjarnarnesi voru sífellt að vinna upp forskot Stjörnunnar.

„Það var meiri barátta og vilji í fyrri hálfleik en ég veit ekki hvað gerðist í hálfleik. Hvort það er stress eða reynsluleysi sem háði okkur veit ég ekki en við vorum einfaldlega ekki tilbúnar í seinni hálfleik.“

Íris sá jákvæða punkta þrátt fyrir tapið.

„Stjarnan er með sterkt lið en við höfum sýnt það í vetur að við erum með hörkulið. Í fyrri hálfleik sýndum við að við eigum fullt erindi í þetta lið og ég vona að í næsta leik náum við að spila okkar besta leik, ekki sparihliðarnar í fyrri og missum tökin í seinni hálfleik. “

„Stefnan er að fylla húsið fyrir næsta leik og vonandi með hjálp stuðningsmanna okkar getum við gert betur í næsta leik,“ sagði Íris að lokum.




Fleiri fréttir

Sjá meira


×