FIMMTUDAGUR 30. MARS NÝJAST 07:00

Blekking

SKOĐANIR

Umfjöllun, viđtöl og myndir: KR - Keflavík 82-80 | Meistararnir sluppu međ skrekkinn

 
Körfubolti
21:45 02. MARS 2017
skrifar frá DHL-höllinni

Íslandsmeistarar KR halda efsta sætinu í Domino´s-deild karla í körfubolta eftir nauman sigur á Keflavík, 82-80, í 20. umferð deildarinnar á heimavelli sínum í vesturbænum í kvöld.

Það stefndi allt í nokkuð öruggan sigur KR-inga en þeir voru með ellefu stiga forskot, 76-65, þegar fimm mínútur voru eftir. Keflvíkingar gáfust ekki upp og hefðu getað komist einu stigi yfir þegar nokkrar sekúndur voru eftir. Guðmundur Jónsson brenndi þá af þriggja stiga skoti.

KR kláraði leikinn á endanum þrátt fyrir hetjulega baráttu gestanna sem fengu 13 sekúndubrot í lokin til að taka lokaskotið og vinna leikinn en það reyndist ekki nægur tími.

Brynjar Þór Björnsson fór á kostum fyrir KR og skoraði 26 stig en hann hitti úr sjö þriggja stiga skotum í tólf tilraunum. P.J. Alawoya skoraði 20 stig fyrir KR og tók tólf fráköst og Jón Arnór Stefánsson skoraði 16 stig.

Hjá Keflavík var Amin Stevens stigahæstur með 25 stig auk þess sem hann tók 16 fráköst en Hörður Axel Vilhjálmsson skoraði 18 stig, tók átta fráköst og gaf tíu stoðsendingar. Landsliðsleikstjórnandinn grátlega nálægt þrennu.

KR-Keflavík 82-80 (23-21, 24-17, 22-20, 13-22)
KR: Brynjar Þór Björnsson 26, Philip Alawoya 20/12 fráköst/3 varin skot, Jón Arnór Stefánsson 16/5 fráköst/6 stoðsendingar, Þórir Guðmundur Þorbjarnarson 8, Darri Hilmarsson 8/7 fráköst, Pavel Ermolinskij 4/14 fráköst/7 stoðsendingar.
Keflavík: Amin Khalil Stevens 25/16 fráköst, Hörður Axel Vilhjálmsson 18/8 fráköst/10 stoðsendingar, Magnús Már Traustason 14, Reggie Dupree 12/4 fráköst, Guðmundur Jónsson 6, Davíð Páll Hermannsson 3, Daði Lár Jónsson 2/4 fráköst.


Amin Stevens skýtur yfir Snorra Hrafnkelsson í leiknum í kvöld.
Amin Stevens skýtur yfir Snorra Hrafnkelsson í leiknum í kvöld. VÍSIR/ANTON BRINK

Af hverju vann KR?
Meistararnir voru búnir að byggja sér upp nægt forskot til að hanga á þessu undir lokin en ekki mátti miklu muna að illa færi. Eins og svo oft áður að leiktíðinni var liðið að spila vel framan af en vantaði kraft til að drepa leikinn.

Keflvíkingar fengu tækifæri til að komast fyrr inn í leikinn og hafa meira svigrúm til mistaka á lokamínútunum en þeir hittu lítið fyrr en Stevens og Hörður Axel tóku af skarið alveg undir lokin. KR bauð upp í dans en Keflvíkingar voru ekki alveg til í valsinn.

KR byggði upp forskotið með að halda Steven niðri en bandaríski miðherjinn komst í gírinn sóknarlega undir lokin. Svo er auðvelt að benda á skotsýningu Brynjars Þór Björnssonar sem lagði grunninn að þessu fyrir KR.

Bestu menn vallarins?
Brynjar Þór Björnsson var geggjaður mest allan leikinn en hann hitti úr sjö af fyrstu níu þriggja stiga skotum sínum, þar af setti hann einn flautuþrist undir lok fyrri hálfleiks. Brynjar er illviðráðanlegur þegar hann er í þessum ham.

Philip Alawoya dró líka vagninn sóknarlega með 20 stigum og átta sóknarfráköstum sem gáfu KR oft annað og þriðja tækifæri til að bæta við stigum.

Amin Stevens og Hörður Axel báru af hjá Keflavík eins og svo oft áður en Hörður skoraði 18 stig, tók átta fráköst og gaf tíu stoðsendingar. Hann er að spila mjög vel sóknarlega í síðustu leikjum og setja niður stór skot.

Tölfræði sem vakti athygli?
Fyrir utan það að Brynjar Þór hitti úr sjö af fyrstu níu skotunum sínum var frákastabaráttan líka áhugaverð en KR tók í heildina 17 sóknarfráköst á móti sjö og vann frákastabaráttuna í heild sinni 48-38.

Hvað gekk illa?
Báðum liðum gekk illa á lokasprettinum. Keflavík gat komist fyrr inn í leikinn en klikkaði á opnum skotum á meðan KR fékk nóg af tækifærum en gat varla keypt sér körfu síðustu tvær mínúturnar.

Áhorfendum á pöllunum gekk líka illa að vera stuðningsmenn. Stemningin í þessum stórleik var sama og engin og mátti heyra saumnál detta á milli þess sem fólk klappaði kurteislega fyrir þriggja stiga skotum Brynjars Þór og fleiri tilþrifum inni á vellinum.


Brynjar Ţór fór á kostum í kvöld.
Brynjar Ţór fór á kostum í kvöld. VÍSIR/ANTON BRINK

Brynjar Þór: Var ekki að fara að berja hann
Brynjar Þór Björnsson, leikmaður KR, bauð upp á skotsýningu framan af leik í kvöld en hann skoraði úr sjö af fyrstu níu þriggja stiga skotunum sínum.

„Mér leið ágætlega fyrir leikinn,“ sagði hann við Vísi í leikslok.  „Ég var búinn að vera ógeðslega stífur í vikunni. Ég tók eina hnébeygju á mánudaginn og leið eins og gömlum manni í þrjá daga en ég var ágætur í dag.“

Þetta er ekki í fyrsta sinn sem þessi ótrúlega skytta dettur í svona ham.

„Þegar maður fær einn opinn þrist þá líður menn ágætlega en annars líður mér alltaf vel þegar ég skýt boltanum. Mér leið ekkert alltof vel fyrir leikinn en stundum hittir maður betur ef maður er ekki með of miklar væntingar,“ sagði Brynjar Þór sem er ósáttur við að hleypa Keflavík inn í leikinn.

„Fjórði leikhlutinn hefur verið akkilesarhæll okkar í vetur. Við verðum alltaf svolítið staðir og horfum of mikið á Jón og Pavel og mig í staðinn fyrir að hlaupa kerfin okkar af krafti. Við þurfum að ræða þetta og bæta. Þetta er búið að gerast það oft eftir áramót að við verðum að nýta okkur þessa bjöllu sem er að hringja.“

Brynjar fékk tæknivillu undir lokin fyrir að öskra á Guðmund Jónsson sem hrinti honum í jörðina. Þetta er ekki í fyrsta sinn sem Brynjar lendir í svona atviki á móti Keflavík.

„Við vorum dottnir í smá glímu þarna og ég spurði bara hvaða rugl þetta væri. Það má aðeins leyfa mönnum að pústa meira en er gert. Ég var augljóslega ekkert að fara að berja hann. Ég var bara aðeins að láta hann heyra það. Það er hluti af leiknum,“ sagði Brynjar Þór Björnsson.


P.J. Alawoya skorađi 20 stig.
P.J. Alawoya skorađi 20 stig. VÍSIR/ANTON BRINK

Finnur Freyr: Auðvitað er ég pirraður
Finnur Freyr Stefánsson, þjálfari KR, gat varla fagnað sigrinum í kvöld hann var svo pirraður yfir því hvernig hans menn hleyptu Keflavík inn í leikinn í fjórða leikhluta.

„Mér fannst við spila prýðilega fyrstu 27-28 mínútur leiksins. Við hleypum þeim aðeins inn í þetta undir lok þriðja en svo tökum við aftur völdin í fjórða leikhluta,“ sagði Finnur Freyr við Vísi eftir leik.

„Hörður Axel og Stevens setja stór skot fyrir Keflavík en mér fannst við varla geta hitt úr skoti undir lokin. Það voru allir að fá góð færi og taka skot sem þeir vanalega setja niður. Það vantaði bara smá töffaraskap í okkur og vilja til að drepa leikinn.“  

KR-liðið er á toppnum í deildinni og á deildarmeistaratitilinn vísan þrátt fyrir að hafa ekki spilað nema í þriðja gír nánast allt tímabilið.

„Ég geri kröfur á mína menn. Við leggjum mikið á okkur til að vera á þeim stað sem við erum. Það eru líka gerðar miklar kröfur til okkar og stundu er erfitt að lifa undir þeim,“ sagði Finnur.

„Þetta er búið að gerast í svo ógeðslega mörgum leikjum þannig auðvitað fer þetta í taugarnar á mér. Við erum alltaf að hleypa liðum inn í leikina aftur og aftur.“

„Ég nenni samt ekki neinu afsökunum. Það er margt sem við þurfum að skoða en þegar uppi er staðið þurfum við bara að leggja spilin á borðið í úrslitakeppninni. Við verðum að vona að þessi spilamennska sé bara nóg eða þá að við mætum til leiks,“ sagði Finnur Freyr Stefánsson.


Hörđur Axel Vilhjálmsson átti stórleik en ţađ dugđi ekki til.
Hörđur Axel Vilhjálmsson átti stórleik en ţađ dugđi ekki til. VÍSIR/ANTON BRINK

Friðrik Ingi: Verðum að nýta þetta tap
Friðrik Ingi Rúnarsson, þjálfari Keflavíkur, var ekkert brjálaður í leikslok enda gerðu hans menn vel í að reyna að stela stigunu í kvöld. Hann vildi auðvitað sjá sigur en viðurkennir styrk KR-liðsins.

„KR-liðið er með hæfileikamenn sem geta leyst ýmsar stöður og skorað körfur í öllum regnbogans litum. Það gaf þeim tækifæri á að halda forskotinu. Þeir voru að setja allskonar skot niður, stundum með menn í andlitinu,“ sagði Friðrik Ingi við Vísi eftir leikinn.

„Við vorum alls ekki að spila fullkominn leik eða neitt í þeim dúr. Spilandi á þessum velli þarftu samt að eiga frábæran leik og passa boltann vel. Það má ekki tapa honum á erfiðum stöðum.“   

Keflavíkurþjálfarinn var svekktur með færanýtinguna undir lokin þegar gestirnir fengu nokkra sénsa til að komast inn í þetta enn frekar og jafnvel komast yfir.

„Mér fannst stundum við í sókninni geta gert mun betur. Það voru sóknir þar sem við áttum að gera betur,“ sagði Friðrik Ingi sem var að tapa sínum fyrsta leik sem þjálfari Keflavíkur.

„Vonandi getum við bara lært af þessu tapi og það geri eitthvað fyrir okkur. Okkur líður ágætlega að ákveðnu leyti með okkar frammistöðu þó alvöru keppnismenn megi auðvitað vera hundfúlir í smá tíma,“ sagði Friðrik Ingi Rúnarsson.


Deila
Athugiđ. Allar athugasemdir eru á ábyrgđ ţeirra er ţćr rita. Vísir hvetur lesendur til ađ halda sig viđ málefnalega umrćđu. Einnig áskilur Vísir sér rétt til ađ fjarlćgja ćrumeiđandi eđa ósćmilegar athugasemdir og ummćli ţeirra sem tjá sig ekki undir eigin nafni.

 

MEST LESIĐ

  • Nýjast á Vísi
  • Mest Lesiđ
  • Fréttir
  • Sport
  • Viđskipti
  • Lífiđ
Forsíđa / Sport / Körfubolti / Umfjöllun, viđtöl og myndir: KR - Keflavík 82-80 | Meistararnir sluppu međ skrekkinn
Fara efst