Viðskipti innlent

Tveir spítalar bundnir í bönkunum

Hafliði Helgason skrifar
Hagnaður bankanna fyrstu níu mánuði ársins nam tæpum 50 milljörðum króna. Samanlagt eigið fé þeirra er 660 milljarðar króna.
Hagnaður bankanna fyrstu níu mánuði ársins nam tæpum 50 milljörðum króna. Samanlagt eigið fé þeirra er 660 milljarðar króna. vísir/vilhelm
Varlega áætlað má gera ráð fyrir því að ríkið gæti fengið andvirði tveggja hátæknisjúkrahúsa með lækkun eiginfjár í íslenska bankakerfinu.

Eiginfjárhlutfall viðskiptabankanna þriggja er frá 25,5% upp í rúm 29% sem er afar hátt í alþjóðlegum samanburði og skýrist m.a. af óvissu vegna losunar gjaldeyrishafta. Líklegt er að ef höft verða losuð með góðum árangri verði eiginfjárkrafa bankanna lækkuð. Ef miðað væri við 20% eiginfjárhlutfall sem er varfærið gætu bankarnir greitt 175 milljarða til eigenda sinna. Ríflega tveir þriðju þess fjár kæmu til ríkisins miðað við núverandi eignarhald.

„Þetta er í rauninni dautt fé í hagkerfinu og erfitt fyrir bankana að ná viðunandi ávöxtun á þetta eigið fé,“ segir Snorri Jakobsson, fjármála- og hagfræðiráðgjafi hjá Capacent. Hann bætir því við að svona mikil binding að óþörfu sé mjög óhagkvæm fyrir þjóðfélagið. „Þetta hefur því ekki bara áhrif á bankana sjálfa, heldur allt atvinnulífið.“

Ríkið á auk Landsbankans og Íslandsbanka um 13 prósenta hlut í Arion banka. Stefnt er að því að selja hlut í bankanum og skrá hann fyrripart næsta árs. Hátt eiginfjárhlutfall veldur því að ekki er ólíklegt að fjárfestar freistist til að fara skuldsettir í kaup á hlut í bankanum.

Hagnaður bankanna fyrstu níu mánuði ársins nam tæpum 50 milljörðum króna. Samanlagt eigið fé þeirra er 660 milljarðar króna.

Fréttin birtist fyrst í Fréttablaðinu.






Fleiri fréttir

Sjá meira


×