Innlent

Tölvuleikjagerð kennd á nýrri námsbraut

Svavar Hávarðsson skrifar
Tölvuleikjamarkaðurinn veltir stjarnfræðilegum upphæðum.
Tölvuleikjamarkaðurinn veltir stjarnfræðilegum upphæðum. vísir/afp
Keilir, miðstöð vísinda, fræða og atvinnulífs, vinnur nú að stofnun nýrrar námsbrautar í gerð tölvuleikja, til viðbótar við það nám sem fyrir er í skólanum. Keilir hyggst taka inn 60 nýja nemendur í haust ef samþykki menntamálaráðuneytisins fæst.

Samtök leikjagerðarfyrirtækja á Íslandi, hópur sem er starfræktur innan Samtaka iðnaðarins, og tölvuleikjarisinn CCP hafa lýst yfir mikilli ánægju og stuðningi við hina nýju námsbraut og hefur forstjóri CCP lýst yfir áhuga á að sitja í fagráði brautarinnar.

Hjálmar Árnason
Hjálmar Árnason, framkvæmdastjóri Keilis, segir að með nýju námsbrautinni hyggist Keilir jafnframt innleiða nýja kennsluhætti til stúdentsprófs. Stuðst verður við góða reynslu af vendinámi – námi sem byggir á því að hefðbundinni kennslu er snúið við; fyrirlestrar og kynningar kennara eru vistaðar á netinu og nemendur geta horft og hlustað á kynningarnar eins oft og þeim hentar. Þá munu sjálfstæð vinnubrögð nemenda skipa háan sess í náminu, náin tengsl við atvinnulífið og samþætting námsgreina.

„Á heimsvísu veltir leikjagerðarmarkaðurinn milljörðum króna. Í umræðu um uppbyggingu atvinnulífs heyrast gjarnan þær raddir að efla þurfi þá þætti er tengjast sköpun, meðal annars með tilvísun í leikjagerð. Almennt eru flestir sammála því að skólakerfið sé ekki að sinna þessum þætti nægjanlega vel en Keilir hyggst með þessu bæta þar úr,“ segir Hjálmar sem getur ekki svarað því af hverju nám sem þetta hefur ekki þegar skotið rótum hérlendis. Tilefnið sé hins vegar ærið, og ekki seinna vænna að bæta þar úr.

Keilir hefur þegar gert samstarfssamning við danska leikjagarðinn Game Park Danmark, sem er skammt frá Árósum. Þar er starfræktur eini menntaskólinn í Danmörku þar sem boðið er upp á leikjagerð sem valgrein og aðaláherslu. Í skólanum er einnig boðið upp á nám á háskólastigi fyrir þá sem vilja í samstarf við háskólann í Árósum og þar er einnig boðið upp á aðstöðu fyrir frumkvöðla á sviði leikjagerðar, en töluvert er um einyrkja og smærri aðila á þessu sviði.

Keilir hyggst koma upp slíkri aðstöðu á Ásbrú þar sem boðið verður upp á stúdentspróf með áherslu á leikjagerð, diplómanám eða BS-nám í leikjagerð, og þá í samstarfi við innlenda og/eða erlenda háskóla. Eins aðstöðu fyrir frumkvöðla í Eldey – tæknismiðju og frumkvöðlasetrinu á Ásbrú.

Fréttin birtist fyrst í Fréttablaðinu.




Fleiri fréttir

Sjá meira


×