Tjónakostnaður dregst saman

Tjónakostnaður á ökutækjum og búnaði lögreglunnar á Vestfjörðum hefur minnkað umtalsvert á milli ára. Tjónakostnaður embættisins á síðasta ári var 15 þúsund krónur samanborið við 46 þúsund krónur árið 2010 og rúmar 642 þúsund krónur árið 2007. Þetta kemur fram í skýrslu starfshóps á vegum Ríkislögreglustjóra um eftirlit með ökutækjum lögreglunnar. Það er mat starfshópsins að fækkun tjóna megi rekja til þess að akstur lögreglunnar hefur dregist mikið saman og að námskeið í forgangsakstri skili betra vinnulagi og breyttu hugarfari.

Einnig telur starfshópurinn að aðhald frá starfshópi Ríkislögreglustjóra og samvinna hans við lögreglustjóra landsins, hafi leitt til fækkunar tjóna og að aukinn öryggisbúnaður á tækjum lögreglunnar lágmarki skemmdir. Lögreglan á Vestfjörðum hefur sjö ökutæki til umráða. Heildar akstur þeirra var 171.013 kílómetrar á síðasta ári. Öll lögregluembættin í landinu hafa 151 ökutæki til umráða og var heildar akstur þeirra á síðasta ári 3.942.515 kílómetrar sem svarar til þess að akstur lögreglunnar hafi dregist saman um 29% frá árinu 2007.

Heildar tjónakostnaður lögreglunnar var 7,3 milljónir króna á síðasta ári á móti 8,4 milljónum króna árið 2010. Flest tjónin urðu á höfuðborgarsvæðinu en þar eru einnig flestar lögreglubifreiðarnar. Átta lögregluembætti á landinu voru hins vegar tjónalaus á síðasta ári. Flest tjón á ökutækjum lögreglunnar verða þegar lögreglumenn sinna venjulegu löggæslueftirliti. „Má því í mörgum tilfellum flokka tjónin undir óvarkárni ökumanna þegar ekið er utan í hluti eða á önnur ökutæki og skemmdir verða á undirvagni af hraðahindrunum og kantsteinum,“ segir í skýrslunni.

Starfshópurinn leggur til að gerðir verði samningur við rannsóknanefnd umferðarslysa um að þeir veiti umsögn vegna óhappa og slysa er verða í akstri lögregluökutækja með forgangi. Telur nefndin að með því verði hægt að greina og leita leiða til að koma í veg fyrir slík óhöpp eða slys.

asta@bb.is