Tjaldvagn brann til kaldra kola

Tjaldvagn sem stóð á tjaldsvæði Eyjafjarðarsveitar í Hrafnagili brann til kaldra kola nú fyrir skömmu.

Einn var í tjaldvagninum þegar bruninn kom upp og var hann fluttur lítillega brenndur á Fjórðungssjúkrahúsið á Akureyri nú skömmu fyrir hádegi.

Að sögn Jóhanns Olsens varðstjóra á Akureyri er málið nú til rannsóknar. Rannsóknin er skammt á veg komin og eru eldsupptök ókunn að svo stöddu. 

Eins og Vísir greindi frá í morgun gekk skemmtanahald annars mjög vel fyrir sig á Akureyri í nótt. 

Lögreglan þurfti að hafa lítil sem engin afskipti af gestum hátíðarinnar Einnar með öllu sem þar fer fram, þó svo að íbúafjöldi sé nú nánast tvöfalt meiri en alla jafna.